काठमाडौं । कोशीमा मुख्यमन्त्री चयनमा दुई पक्ष देखिएपछि नेपाली कांग्रेस सभापति शेरबहादुर देउवाले केन्द्रीय कार्यसम्पादन समितिको बैठक बोलाएका छन् ।

शुक्रबार ३ बजेपछि देउवाको निजी निवास, धुम्बाराहीमा देउवाले बैठक बोलाएको कांग्रेस मुख्य सचिव कृष्णप्रसाद पौडेलले जानकारी दिए ।बैठकमा कोशी प्रदेशमा कांग्रेस सांसदहरुले चालेको कदमका बारेमा छलफल हुने पौडेलले बताए ।

देउवाले मुख्यमन्त्रीमा नेकपा माओवादीका इन्द्र आङबोलाई समर्थन गर्ने निर्णय गरेको भए पनि कांग्रेस कोशीका सांसद केदार कार्कीले पार्टीका ७ र नेकपा एमालेका सांसदको समर्थनमा मुख्यमन्त्रीमा दाबी पेस गरेका छन् ।

कोशी प्रदेशमा संविधानको धारा १६८ उपधारा ५ बमोजिमको सरकार गठन गर्न मुख्यमन्त्रीमा दाबी गर्ने समय शुक्रबार साँझ ५ बजे सकिँदैछ ।

कांग्रेस सांसद कार्कीले मुख्यमन्त्रीमा पेस गरेको दाबीमा एमालेका ४० र कांग्रेसकै ८ जना सांसदको समर्थन छ ।