आज ऐश्वर्या रायको ५० औं जन्मदिन हो ।

बलिउडमा झण्डै साढे दुई दशक पूरा गरिसकेकी ऐश्वर्या आफ्नो सौन्दर्यका कारण मात्र होइन आफ्नो नृत्य र अभिनयले करोडौं फ्यान पनि बनाएकी छिन् । उनले हिन्दी मात्रै होइन, तमिल, तेलुगु, बंगाली र हलिउड फिल्ममा पनि नाम कमाएकी छिन् ।

तर, विवाहपछि उनको करियरमा केहि बाधा आएको थियो । पछिल्लो डेढ दशकमा उनका ४ वटा मात्रै फिल्म हिट भएका छन् । अहिले कुनै आगामी परियोजना पनि छैनन्। यसका बावजुद उनको कमाइ घटेको छैन ।

ऐश्वर्या अहिले पनि बलिउडकी सबैभन्दा धनी अभिनेत्री हुन् । उनी ८२८ करोड भारुको नेटवर्थको साथ पहिलो नम्बरमा छिन्। प्रियंका चोपडा र दीपिका पादुकोणजस्ता नायिकाहरू उनको पछाडी छन् ।

कक्षा ९ देखि मोडलिङ सुरु गरिन्
सानैदेखि ऐश्वर्याको सौन्दर्यले सबैको ध्यान खिचेको थियो । यो घटना तबको हो जब उनकी अङ्ग्रेजी प्राध्यापक पत्रिकामा फोटो पत्रकारको रुपमा काम गर्थिन् । उनलाई एउटा प्रोजेक्टका लागि मोडल चाहिएको थियो, प्रोजेक्टको म्याद नजिकिदै गर्दा प्रोफेसरले ऐश्वर्यालाई मोडलिङ गर्न आग्रह गरिन् । ऐश्वर्या सहमत भइन् र यसरी उनले आफ्नो पहिलो मोडलिङ प्रोजेक्ट ९ कक्षामा मात्रै पूरा गरिन् ।

सन् १९९४ मा मिस वर्ल्ड बनेकी
ऐश्वर्याका लागि सन् १९९४ कोसेढुङ्गा साबित भयो । उनी मिस वर्ल्ड प्रतियोगितामा भारतको प्रतिनिधित्व गर्न गएकी थिइन् । प्रतियोगिता सन सिटी इन्टरटेनमेन्ट सेन्टर, सन सिटी साउथ अफ्रिकामा भएको थियो जहाँ ऐश्वर्या विजेता भइन् ।

प्रतियोगितामा विभिन्न देशका ८७ मोडलले भाग लिएका थिए । सन् १९९३ मा जमैकाकी मिस वर्ल्ड लिसा हन्नाले ऐश्वर्यालाई मिस वर्ल्डको ताज पहिराएकी थिइन् । ऐश्वर्या मिस वर्ल्डको ताज जित्ने दोस्रो भारतीय मोडल हुन् । त्यसअघि सन् १९६६ मा मुम्बईकी रीता फारियाले यो अवार्ड जितेकी थिइन् ।

सलमानको रिसबाट डराएर सम्बन्ध तोडिन्
फिल्म ‘हम दिल दे चुके सनम’ को सुटिङका ​​क्रममा ऐश्वर्या सलमान खानसँग नजिकिइन्। दुबैजना सेटमा घण्टौं सँगै बिताउँथे ।

केही समय डेट गरेपछि सलमानले ऐश्वर्यालाई विवाहको प्रस्ताव गरे तर ऐश्वर्याले अस्वीकार गरिन् । यसको कारण उनको करियर थियो। प्रस्ताव अस्वीकार गरेपछि सलमान उनीसँग निकै रिसाए र मध्यरातमा उनको घर गए, तर ऐश्वर्याले ढोका खोलिनन् ।

यति मात्र होइन, सलमानले ढोका नखोल्दा फ्ल्याटबाट हाम फालेर आत्महत्या गर्ने धम्की पनि दिएका थिए । यसबाट ऐश्वर्या निकै डराइन् र सलमानसँगको सम्बन्ध तोड्ने निर्णय गरिन् । जब यो कुरा सलमानलाई थाहा भयो, उनी आक्रोशित भए । ऐश्वर्याको फिल्म ‘कुछ ना कहो’ को सेटमा सलमानले हंगामा मच्चाएका थिए । पछि उनीहरुको सम्बन्ध पूर्णरुपमा तोडियो ।

शाहरुखका ५ फिल्मबाट हटाइयो
शाहरुख खान र ऐश्वर्याले मोहब्बतें, देवदास र जोशमा सँगै काम गरेका थिए । उनीहरुको जोडि दर्शकले निकै रुचाएका थिए । रियल लाइफमा पनि दुबैको राम्रो मित्रता थियो तर यसका बावजुद ऐश्वर्या शाहरुखका पाँच फिल्मबाट हटाइएकी थिइन् । यो के कारण भयो भन्ने कुरा न त ऐश्वर्या र न शाहरुखले सीधै उल्लेख गरेका छन् ।

सिमी गरेवाललाई दिएको एक अन्तर्वार्तामा ऐश्वर्यालाई यसबारे सोध्दा उनले मलाई फिल्मबाट कहिले निकालियो भन्ने थाहा नभएको बताइन् । तर, पछि शाहरुखले यसप्रति दुःख व्यक्त गर्दै ऐश्वर्यासँग माफी पनि मागेका थिए ।पछि उनीहरु दुवै २०१६ मा ‘ए दिल है मुश्किल’ मा देखिएका थिए, जसमा शाहरुखको क्यामियो थियो ।

आमिर खानसँग काम गरिनन्
ऐश्वर्याले बलिउडका दुई खान अभिनेता (शाहरुख-सलमान)सँग फिल्म गरिसकेकी छिन्, तर उनले आमिर खानसँग कहिल्यै स्क्रिन सेयर गरिनन्। सँगै काम गर्ने अफर नआएको पनि होइन । धेरै अफर आए पनि मतभिन्नताका कारण उनीहरु कुनै पनि फिल्ममा सँगै देखिएनन् ।

वास्तवमा ऐश्वर्या र आमिर खान एक विज्ञापनमा सँगै देखिएका थिए । यसक्रममा आमिरले ऐश्वर्यासँग एक ठट्टा गरेका थिए जसका कारण अभिनेत्री उनीसँग निकै रिसाएकी थिइन् । उनले आमिरसँग फिल्ममा काम नगर्ने पनि बताइन् । यद्यपि, उनले आमिरको फिल्म मेलामा केमियो गरे, जसको स्क्रिन टाइम निकै कम थियो।

अभिषेकको भन्दा तीन गुणा बढी सम्पत्ति
करियरमा बाधा आए पनि ऐश्वर्याको कुल सम्पत्तिमा कुनै असर परेको छैन । जी बिजनेशको रिपोर्ट अनुसार ऐश्वर्या ८२८ करोड भारुको मालिक हुन् । उनको पति अभिनेता अभिषेक बच्चनको सम्पत्ति करिब २५० करोड रुपैयाँ भारु रहेको छ ।मिडिया रिपोर्टका अनुसार ऐश्वर्याले एक फिल्मको लागि १० देखि १२ करोड भारु सम्म लिने गरेकी छन् ।

ऐश्वर्यासँग करिब २० वटा ब्रान्ड एन्डोर्समेन्ट छन्, जसबाट उनले वार्षिक करिब १०० करोड रुपैयाँ भारु कमाउँछन्। उनी लक्स, नक्षत्र डायमण्ड ज्वेलरी, कल्याण ज्वेलर्स, कोका कोला, लोढा ग्रुप, पेप्सी, टाइटन वाच, ल्याक्मे कस्मेटिक्स, क्यासियो, फिलिप्स, पामोलिभ, क्याडबरी, फुजी फिल्म्स, डी बियर्स डायमण्ड्स, टीटीके प्रेस्टिज ग्रुप लगायत धेरै कम्पनीको ब्रान्ड एम्बेसडर हुन्। उनी स्विस लक्जरी घडी लङ्गिनससँग पनि वर्षौंदेखि ब्रान्ड एम्बेसडरको रूपमा आबद्ध छिन्।

विवाहपछि करियर फ्लप
ऐश्वर्याले सन् २००७ मा अभिषेक बच्चनसँग विवाह गरिन् । त्यो बेला अभिनेत्रीहरूले विवाहपछि फिल्मबाट ब्रेक लिने गर्थे तर ऐश्वर्याले त्यसो गरिनन् । सोही वर्ष उनका तीन फिल्म गुरु, द लास्ट लिजन, प्रोभोक्ड रिलिज भए । २००८ देखि २०१० सम्म हरेक वर्ष उनका दुई-तीनवटा फिल्म रिलिज भए, जसमध्ये तमिल फिल्म ‘एन्थिरान’ मात्र हिट भयो। गर्भावस्थामा ऐश्वर्याको करियर झनै सुस्त भयो ।

सन् २०११ मा उनी छोरी आराध्याकी आमा बनिन् । त्यसपछि उनले सन् २०१४ सम्म कुनै फिल्म साइन गरिनन् । सन् २०१५ मा उनले फिल्म ‘जज्बा’ बाट कमब्याक गरिन् तर त्यो फ्लप साबित भयो । सोही वर्ष उनका थप दुई फिल्म ‘सरबजीत’ र ‘ए दिल है मुश्किल’ रिलिज भए, जसमध्ये ‘ए दिल है मुश्किल’ हिट भयो । सन् २०१८ मा रिलिज भएको ‘फन्ने खान’ पनि फ्लप भयो । २०२२ मा ‘पोन्नियिन सेल्भान १’ र ‘पोनियिन सेल्भान २’ मा उनको कामको प्रशंसा भएको थियो, तर हाल उनीसँग कुनै प्रोजेक्ट छैन।