काठमाडौं । नेकपा एमालेले फागुन १ गतेको बिदालाई निरन्तरता दिने हो भने संसदबाट पारित गरेर देखाउन सरकारलाई चुनौति दिएको छ । एमालेले संसदबाट पातिर भए फागुन १ मा बिदा दिन सकिने प्रस्ताव संसद बैठकमै राखेको छ ।

प्रतिनिधिसभाको बिहिबारको बैठकमा बोल्दै एमाले उपाध्यक्ष विष्णु पौडेलले एमालेको त्यस्तो प्रस्ताव रहेको बताएका हुन् ।
माओवादी सशस्त्र युद्ध सुरु भएको दिन सरकारले सार्वजनिक बिदा दिने निर्णय गरेको थियो । एमालेसमेत सरकारमै रहेका बेला प्रधानमन्त्री प्रचण्डले यस्तो निर्णय लिएका थिए । तर सरकारबाट बाहिरिएपछि एमालेले उक्त दिनको बिदाको विरोध गदैं आईरहेको छ ।

संक्रमणकालिन न्यायका विषयमा विवाद टुग्गो लगाउने भए उक्त बिदा हटाउनु पर्ने प्रस्ताव समेत एमालेले प्रधानमन्त्रीसँगको भेटमा गदैं आएको थियो ।

त्यही क्रममा संसदमै उसले आज संसदबाट पारित गरेर देखाउन नत्र फिर्ता लिन सकरारलाई चुनौति दिएको हो ।

‘यदि यो सरकारलाई फागुन १ गते युद्ध दिवश मनाउनु ठीक हो भन्ने लाग्छ भने यो सदनमा प्रस्तुत गरेर पारित गरोस्’ पौडेलले भने, ‘त्यसको परीक्षण गर्न सरकार तयार छ रु सरकार यो गलत निर्णयबाट पछाडि हटोस् । यदि पछाडि हट्न चाहदैन भने सदनमा ल्याओस् ।’

फागुन १ गते नेपालमा हिंसाको आरम्भ भएको भन्दै पौडेलले त्यस दिन उत्सवको दिन हुन नसक्ने जिकिर गरे । ‘त्यो नेपालमा हिंसा आरम्भ भएको दिन थियो । हिंसाको बाटो गलत थियो भनेर साथीहरु शान्ति प्रक्रियामा सहभागी हुनुभएको हो । त्यो स्वीकारोत्तिका साथमा उहाँहरुको यो सदनमा उपस्थिति छ भन्ने म मान्दछु ।’