काठमाडौँ । काठमाडौँ महानगरपालिकाले तिहारका लागि सयपत्री फूलको माला विक्री गर्ने ४ स्थान तोकेको छ । काठमाडौँ महानगर प्रहरी प्रमुख राजुनाथ पाण्डेले भृकुटीमण्डप, एयरपोर्ट–तीनकुने, हाँडी गाउँ र बालाजु कोल्ड स्टोर छेउ स्वदेशी उत्पादनको सहुलियतमा फूल विक्रीका लागि खुला गरेको जानकारी दिए ।

महानगर प्रमुख बालेन शाहको निर्देशनमा ती स्थान तोकिएको नगर प्रहरी प्रमुख पाण्डेले जानकारी दिए ।

शनिबार महानगरपालिका र स्वदेशी फूल उत्पादक र बिक्रेताबीच राखिएको छलफलमा महानगर प्रहरी प्रमुख पाण्डेले यस्तो जानकारी दिएका हुन् ।

नेपाल फ्लोरीकल्चयर एसोसिएसन नेपालका अध्यक्ष मीनबहादुर तामाङले यो वर्ष अघिल्लो वर्षभन्दा धेरै सयपत्री फूल खेती भएको बताउँदै झन्डै २ सय विघाहा भन्दा बढी जमिनमा फूल लगाएको जानकारी दिए ।

यो वर्ष ८० प्रतिशत नेपाली सयपत्री फूलले धान्ने २० प्रतिशत जति नपुग हुने अनुमान गरेको भए पनि भारतबाट ठुलो मात्रामा फूल आयात अनुमति दिएको बताए । भन्सारबाट सयपत्री फूल आयतका लागि ५८ वटा अनुमति दिएकोमा फ्लोरिकल्चर एसोसिएसनले ध्यानाकर्षण गराएपछि ४८ वटा अनुमति कार्तिक २३ गते रद्द भएको बताए ।

कार्तिक १३ गते नेपाल ल्याउन ४ लाख ५० हजार केजी माला अनुमति दिएको र त्यो नेपाल भित्रियो भने नेपाली किसानहरूले बनाएको माला र फूल फ्याँक्नुपर्ने अवस्था आउने अध्यक्ष तामाङले बताए ।

कार्तिक २३ गते अगाडि ३ लाख २ हजार केजी माला वैद्य रूपमा नेपाल भित्रिएको र नेपालका विभिन्न कोल्ड स्टोरहरूमा राखिएको अवस्थामा रहेको उनले बताए । खुला नाकाको फाइदा उठाउँदै ठुलो परिणाममा भारतीय माला आएकोले काठमाडौँ महानगरपालिकाले त्यसको बिक्रीमा रोक लगाउन उनले आग्रह गरे ।

नेपाल उद्योग वाणिज्य महासंघको कृषि उद्यम केन्द्रको बोर्ड सदस्य सुनिता नेमाफुकीले महानगरपालिकाले नेपाली फूल बिक्री गर्न पाएनन् भने ६ महिनादेखिको मिहेनत र सपना खेर जाने बताइन् ।

नेपालमा आर्थिक मन्दी भइरहेका बेला नेपाली किसानले उत्पादन गरेको सयपत्री फूल किन्दा नेपाली पैसा विदेश जान रोकिने बताइन् । महानगरपालिकाले प्लास्टिकजन्य फूलको माला बिक्री गर्न रोक लगाउने कामको लागि धन्यवाद ज्ञापन गरिन् ।

महानगरपालिका प्रहरी प्रमुख राजुनाथ पाण्डेले नेपाली किसानले उत्पादन गरेको फूललाई प्रवर्द्धन गर्ने, नेपाली किसानको पसिनालाई इज्जत र सम्मान गर्नका लागि खरिद बिक्री स्थान तोक्ने काम गरिएको बताए । उनले भने, हामीले फूल प्रयोग गर्दा नेपाली उत्पादनलाई छोडेर अरू प्रयोग गर्नु ठिक होइन कि जस्तो लाग्छ । नेपाली उत्पादनलाई सबैले माया गरौँ, नेपालीको घरमा नेपाली फूल होस भन्ने हाम्रो मेयर सावको चाहना र निर्देशन अनुसार नै हामी नेपाली फूल बिक्रीका स्थान घोषणा गरेका हौँ ।’

महानगरपालिकाले तोकेका ४ स्थानमा नेपाली फूलहरू मात्रै रहने र नेपाली फूल उत्पादक किसानलाई फूल बिक्रीका लागि महानगरपालिकाले अवरोध नगर्ने बताए ।