काठमाडौं । विकेटकिपर अनिल कुमार शाहको शतकको सहयोगमा मधेश प्रदेशले प्रधानमन्त्री कप एकदिवसीय राष्ट्रिय प्रतियोगितामा गण्डकी प्रदेशलाई ३ सय ३६ रनको विशाल लक्ष्य दिएको छ ।

त्रिवि क्रिकेट मैदान मैदानमा टस जितेर पहिला ब्याटिङ रोेजेको मधेशले निर्धारित ५० ओभरमा ५ विकेट गुमाउँदै ३३५ रन बनाएको हो ।

प्रधानमन्त्री कप क्रिकेट हालसम्मकै दोस्रो ठूलो योगफल हो । यसअघि २०१८ मा एपीएफले मधेशलाई ३३९ रन हानेको थियो ।

मधेशका लागि अनिल साहले १२५ बलमा ११ चौका र ६ छक्कासहित १२७ रनको शानदार शतकीय इनिङ खेले ।

अरनिको यादव ६३ र अविशेक तिवारी २७ रनमा नटआउट रहे। पवन सर्राफले ४० र रुपेश सिंहले ३२ रन थपे। मयन यादव २७ रनमा आउट भए।

गण्डकीका सन्दीप पराजुलीले १० ओभरमा ५१ रन खर्चेर २ विकेट लिए । कृष्ण पौडेल र कमल परियारले १/१ विकेट लिए ।