काठमाडौँ । द्वन्द्वका क्रममा सोमबार म्यान्माबाट प्रहार गरिएको मोर्टार गोला सीमापार बङ्गलादेशको एउटा गाउँमा खस्दा कम्तीमा दुई जनाको मृत्यु भएको प्रहरीले बताएको छ ।

सन् २०२१ को सैन्य विद्रोहपछि विद्रोही अराकान सेना एएले ठूलो स्तरको युद्धविराम भङ्ग गरेसँगै बङ्गलादेशसँगको दुई सय ७० किलोमिटरको सीमा नजिकै म्यान्माका केही भागमा नोभेम्बरपछि लगातार झडपहरू भएका छन् ।

स्थानीय प्रहरी प्रमुख अब्दुल मन्नानले भने, “दिउँसो करिब सवा दुई बजे स्थानीय समय जलपाइतोली गाउँमा गोलीबारीमा दुई जना मारिएका छन् ।” प्रहरीका अनुसार ४८ वर्षीया बङ्गलादेशी महिला होस्ने आरा र एक अज्ञात जातीय रोहिङ्ग्या व्यक्तिको हत्या भएको हो ।

“उनी भान्छामा बस्नुभएको बेला एउटा मोर्टार त्यहाँ खस्यो”, आराकी बुहारीले आफ्नो नाम बताउन निकै विचलित हुँदै भने, “आफ्नो खेतमा काम गर्न राखिएका रोहिङ्ग्यालाई दिवा भोजन पस्किँदै गर्दा उनी माथि आक्रमण भएको हो ।”

बङ्गलादेशका गृहमन्त्री असदुज्जमान खानले आइतबार छिमेकी म्यान्माको अशान्त रखाइन राज्यका सीमा प्रहरी अधिकारीहरू एए लडाकू अगाडि बढ्नुअघि ‘आत्मरक्षाका लागि हाम्रो क्षेत्रमा प्रवेश गरेका छन्’ भनेका थिए। मुलुकको सीमावर्ती बल बोर्डर गार्ड बङ्गलादेशका एक प्रवक्ताले सोमबार एएफपीलाई भने, “म्यान्माका कम्तीमा ९५ सीमा अधिकारीले सीमा पार गरेर बङ्गलादेशका सीमा चौकीहरूमा शरण लिइसकेका छन् ।”

सहायता एजेन्सी डाक्टर्स विदआउट बोर्डर्स एमएसएफले कक्स बजारमा उसका चिकित्सकहरूले आइतबार ‘बङ्गलादेश–म्यान्मा सीमामा भएको लडाइँपछि’ १७ जना बिरामी प्राप्त गरेको बताएको छ । “सबै बिरामीलाई गोली लागेको छ, दुई जनाको अवस्था जोखिममा रहेको भेटियो र अन्य पाँच जना गम्भीर घाइते थिए ।”

अक्टोबरमा एए विद्रोही तथा अन्य जातीय अल्पसङ्ख्यक लडाकूहरूसहितको गठबन्धनले उत्तरी म्यान्मामा संयुक्त आक्रमण गरेर चिनियाँ सीमामा महत्त्वपूर्ण व्यापारिक केन्द्रमाथि कब्जा गर्यो । गत महिना गठबन्धनले चीनको मध्यस्थतामा युद्धविरामको घोषणा गरेको थियो तर लडाइँ जारी भएको बङ्गलादेशी र भारतीय सीमा नजिकैका क्षेत्रहरूमा उक्त युद्धविराम लागु हुँदैन ।