काठमाडौँ । खाद्य व्यवस्था तथा व्यापार कम्पनीका लागि चामल खरिदको ठेक्का पाएको सप्लायर्सले भारतबाट म्याद नाघेका, कुहिएका कमसल चामल ल्याएर वितरणको तयारी थालेको छ ।

खाद्य व्यवस्था तथा व्यापार कम्पनीले जेठ ३२ गते जारी गरेको बोलपत्र अनुसार करिब ७० प्रतिशत चामलको ठेक्का श्री जयगुरु राइस मिल झापाले पाएको छ । सो मिलले कम्पनिकाे प्रादेशिक कार्यालय धनगढी, मुख्य शाखा कार्यालय राजापुर, तुलसिपुर, भैरहवाको अरुवा मोटा चामलको ठेक्का पार्न सफल भएको थियो ।

मिलेमतोमा ठेक्का पाएको जयगुरुले भारतबाट कुहिएको चामल ल्याएर वितरण गर्ने तयारी थालेको छ । भारत सरकारले आफ्ना विपन्न नागरिकलाई सहुलियत दरमा एफसिआई चामल वितरण गर्ने गरेको छ । सोही चोरी गरेर राखिएका एफसिआई चामल, मिति गुज्रिएका चामल नवलपरासी र रुपन्देहीको सिमानाकाबाट भन्सार छलेर ट्रकका ट्रक भित्राउने काम अहिले भइरहेको स्रोतले जानकारी दियो ।

यसरी गैरकानुनी ढंगबाट नेपाल भित्राइएका चामलमा नेपाली मिलको लेवल त्यसमा दिइराखिएको छ । शुभराजेश ट्रेडस् परासी , जय श्रीलक्ष्मी सप्लायर्स भैरहवाले अहिले सामाग्री भित्राइरहेको बताइन्छ ।

खाद्य व्यवस्था तथा व्यापार कम्पनीका केही कर्मचारीसँगको मिलेमतोमा सूचना चुहाई जयगुरु मिलले ठेक्का पार्न सफल भएको अन्य प्रतिस्पर्धी मिलहरुको दावी छ । सात ठाउँका लागि चामल माग गरिएकाेमा आधाभन्दा बढी ठाउँ अर्थात चार ठाउँकाे ठेक्का जयगुरुले पाएकाे छ । मिलेमतो बिना एउटै कम्पनीले सबै ठाउँकाे ठेक्का पाउने सम्भावनानै नहुने जानकार बताउँछन् ।

खाद्य व्यवस्था तथा व्यापार कम्पनी लिमिटेडका नि. प्रमुख डिल्लीराज लम्सालले भने कानुन अनुसारनै जयगुरु मिल बोलपत्र स्वीकृतीका लागि छनोट भएको बताए । उनले कुनैपनि मिल बढी ठेक्काका लागि छनाैट हुनु जालझेल र मिलेमतो नभएर कानुनगत सबै प्रक्रिया पुगेर भएकाे बताए । ‘जालझेल हुने कुरै छैन कानुनी प्रक्रिया र प्रमाण जसको पुग्छ उसैले ठेक्का पाउने हो’ उनले भने ।

कानुन नपुगेका, रित नपुगेका, करचुक्ता, इजाजत प्रमाणपत्रहरु नपुगेका बोलपत्र अस्वीकृत भएकाे उनले बताए ।

कुहिएको चामल ल्याएर वितरण गर्ने तयारी रहेकाे आरोपबारे नि. प्रमुख लम्सालले भारतबाट चामल आयात गर्न खाद्य कम्पनीले कुनैपनि इजाजत वा सिफारिस नदिएको बताए । प्राविधिकले पास गरेको चामल मात्रै ग्राहकलाई वितरण हुने उनको भनाइ छ ।

‘भारतबाट ल्याउन खाद्यले कुनैपनि इजाजत दिएको छैन । प्राविधिकले पास गरेपछि मात्र चामल ग्राहकलाई जाने हाे’ । केही कैफियत भेटिए अनुसन्धान गर्छौं ‘ उनले भने।