म्याग्दी । म्याग्दीको रघुगंगा गाउँपालिका–३ राहुघाट र बेनी नगरपालिका–९ गलेश्वर पहिरो, कटान र बाढीको चपेटामा परेको छ ।

संरक्षणका लागि बनाइएको तटबन्ध बगाएको बाढीले सडकलाई कटान गरेर साघुरो बनाएपछि राहुघाटमा बेनी–जोमसोम सडक जोखिममा परेको हो । रघुगंगा नदीले गलेश्वर तर्फ बाढी नियन्त्रणका लागि निर्माण गरेको तटबन्ध भत्काएपछि बस्ती, मोटरेबल पुल र राहुघाटको बस्ति बाढीको जोखिममा परेको छ ।

रघुगंगाको बाढीले गलेश्वरको मोटरेबल पुल नजिकै करिब ५० मिटर पाइपलाईन बगाएपछि रिठाखर्क र पुम्दीको मुहानबाट बेनीमा शुक्रबार बिहान देखि खानेपानी आपुर्ति बन्द भएको छ । राहुघाट र कालीगण्डकीको दोभानबाट ढुंगा, गिट्टी, बालुवा निकाल्न डोजर लैजान बनाइएको बाटोबाट बाढी पसेर सडक कटान गरेको हो ।

राहुघाटका बासिन्दाहरु रातको समयमा गलेश्वमा रहेका आफन्तकहाँ गएर सुत्ने गरेका छन् । राहुघाटमा रहेको धार्मिक तथा ऐतिहाँसिक महत्वको गायत्री मन्दिर क्षेत्र उच्च जोखिममा परेको छ ।