नवलपुर (नवलपरासी)। गैँडाकोटका ६३ वर्षीय किसान गोपिचन्द्र रिमालले गँड्यौलापालनबाट मासिकरुपमा झण्डै रु दुई लाख आम्दानी गर्दै आएका छन् ।

रिमालले नवलपरासी (बर्दघाट–सुस्तापूर्व)को गैँडाकोट–५ वैकुण्ठपथमा तीन वर्ष अगाडि सुरु गर्नुभएको गँड्यौलापालनबाट दुई महिनामा करिब रु तीन लाख ६० हजार आम्दानी गर्ने गरेको बताए । उनले एक कठ्ठा क्षेत्रफलमा १२ वटा ब्याड निर्माण गरी गँड्यौलापालन सुरु गरेको बताए ।

एउटा ब्याडमा गँड्यौला राखेको दुई महिनामा गड्यौले मल तयार हुने भन्दै प्रतिब्याड दुई महिनामा रु ३० हजार आम्दानी भइरहेको रिमालले बताए । एउटा ब्याडमा दुई ट्रयाक्टर मल, श्रमिकको ज्याला, प्याकिङ प्लाष्टिकसहित करिब रु १५ हजार लागनी हुने भन्दै ब्याडबाट दुई महिनाभित्र कम्तिमा १२ क्विन्टल मल उत्पादन हुँदै आएको रिमालले बताए ।

रिमालकाअनुसार उनले प्रतिकिलो रु २५ का दरले गड्यौले मल बिक्री गर्दै आएका छन् । उनले गैँडाकोटमा उत्पादन गरेको गड्यौले मल जिल्लाका अधिकांश एग्रोभेट, नर्सरीमा खपत हुने गरेको भन्दै केही मल गोरखा, चितवनलगायतका जिल्लामा समेत बिक्री गर्दै आएको जानकारी दिए । उत्पादन भएको एक वर्षसम्म गड्यौले मलमा विभिन्न १६ प्रकारका तत्वहरु रहने भन्दै कृषकले एक वर्षसम्म गड्यौले मल प्रयोग गर्न सक्ने बताए ।

पोखराबाट प्रतिकिलो रु दुई हजार पाँच सयका दरले ल्याएको तीन किलो गँड्यौलाबाट व्यवसायिक रुपमा गँड्यौलापालन सुरु गरेको स्मरण गर्दै रिमालले आफूले तालिम बिनानै गँड्यौलापालन सुरु गरेको बताए । अहिले गँड्यौलापालन गर्न इच्छुक कृषकका लागि आफूले प्रतिकिलो रु एक हजार पाँच सयमै गँड्यौला दिने भन्दै उनले कृषकहरुलाई गँड्यौलापालनबारे तालिम समेत निःशुल्क प्रदान गर्दै आएको बताए।