काठमाडौं । नेपाली कांग्रेसका सांसहरूको १५ दिनको तलब रकम बाढीपहिरोपीडितलाई दिने निर्णय गरिएको छ । आइतबार बसेको कांग्रेस संसदीय दलको बैठकबाट यस्तो निर्णय गरिएको हो ।

आइतबारै बिहान बसेको कार्यसम्पादन समिति बैठकले पार्टी कोषबाट ५० लाख रुपैयाँ पीडितको राहतका निम्ति दिने निर्णय गरेको थियो । संसदीय दलका तर्फबाट गरिएको निर्णयसँगै कांग्रेसले पीडितको राहतका निम्ति थप ३० लाख बढी रकम सहयोग गर्ने निर्णय गरेको हो ।

संसदीय दलको बैठकबाट राष्ट्रियसभा र प्रतिनिधिसभा दुवैतर्फका सांसदहरूका १५ दिनको तलब पीडितको राहतका निम्ति दिने निर्णय गरिएको छ । कांग्रेसका राष्ट्रियसभामा १७ र प्रतिनिधिसभामा ८७ सांसद छन् । यी दुवैतर्फका ११४ सांसदका आधा महिनाको तलब पौने ३७ लाख रुपैयाँ हुन्छ ।

कांग्रेसले सरकारलाई उद्धार र राहतमा लाग्न पनि आग्रह गरेको छ । कांग्रेसले संघीय संसद्का सबै सांसदहरूलाई विपद्को घडीमा सहयोग गर्न समेत आह्वान गरेको छ ।