काठमाडौं । काठमाडौं महानगरपालिकामा गत आर्थिक वर्षको तुलनामा यसवर्ष रूख कटान र जल उत्पन्न विपद्का घटना बढेका छन् । 

यस वर्षको पुस मसान्त सम्म २ सय ३४ विपद्का घटना भएको काठमाडौं महानगरपालिकाले जनाएको छ । काठमाडौं महानगरपालिका विपद् व्यवस्थापन विभागका नगर प्रहरी उपरीक्षक विष्णुप्रसाद जोशीका अनुसार चालु आर्थिक वर्षको पुस मसान्त सम्म सबै भन्दा धेरै रूख कटानका कारण ७७ र जल उत्पन्न प्रकोपका कारण ५० घटना भएका छन् ।  

त्यसैगरी विद्युत्बाट आगालागीका घटना ५९, खाना पकाउने ग्यास बाट २ र अन्य विभिद्का घटना १२ रहेको विष्णुप्रसाद जोशीले जानकारी दिए । उनका अनुसार काठमाडौं महानगरपालिका क्षेत्रमा बत्तीको पोलमा हुने आगलागीका घटना बढी नै छन् । जोशीका अनुसार सडक किनारामा रूप रोप्ने काम जारी रहेको र पुराना रूख व्यवस्थापनको काम नभएकाले रूख बाट हुने विपद्का घटना बढेको हो । यस्ता घटनामा कमी ल्याउन काठमाडौं महानगरपालिकाले पुराना रूख व्यवस्थापनको काम गरिरहेको उनले जानकारी दिए । 

गत आर्थिक वर्ष भरमा विभिन्न प्रकारका गरी चार सय ३१ विपद्का मात्र घटना घटेका थिए । यसरी बत्तीको पोलमा हुने आगलागीका घटना विभिन्न इन्टरनेट सेवा प्रदायक संस्थाले अस्तव्यस्त रूपमा राखेको तारको कारणले हुने गरेको काठमाडौं महानगरपालिकाको ठहर छ ।  

त्यसैगरी जीर्ण खाना पकाउने ग्यास सिडिण्डरको प्रयोग, ग्यास पाइप र लेगुलेटरको नियमित परीक्षण नगर्दा र वार्षिक रूपमा नफेर्दा आगोजन्य विपद्का घटनामा कमी आउन नसकेको उपरीक्षक जोशीको भनाइ छ । विपद्का घटना बढ्न थालेपछि कामपाले यसको नियन्त्रणका कृतिम अभ्यास र सर्वसाधारणको लागि जनचेतनाका कार्यक्रम समेत गर्न थालेको छ । कृतिम अभ्यास अन्तर्गत सुरक्षित तबर बाट आगो कसरी निभाउने, सडक दुर्घटना भएको समयमा घाइतेलाई तत्काल अस्पताल सम्म कसरी लैजाने जस्ता विषयमा जानकारी गराइरहेको छ । 

काठमाडौं महानगरपालिकाले आगलागी हुँदा दमकल जान नसक्ने साँघुरा सडक तथा गल्लीमा ड्राइ राइजर जडानको काम तीव्र रूपमा अघि बढाएको छ । काठमाडौं महानगरपालिकाको वडा नम्बर ६, ७, ९, १३, १७, १८, २१, २५ र २७ ड्राइ राइजर जडान भइसकेको छ भने अन्य वडाहरूमा आवश्यकता अनुसार उक्त प्रविधि जडान भइरहेको छ ।