नवलपरासी । पूर्वपश्चिम राजमार्गअन्तर्गत नवलपरासी (बर्दघाट–सुस्तापूर्व) को दुम्कीवास जंगल क्षेत्रमा बस र ईभी हायस एकापसमा ठोक्किँदा एक भारतीय नागरिकको मृत्यु भएको छ । नौजना घाइते छन् ।

विनयी त्रिवेणी गाउँपालिका–१, दुम्कीवासस्थित डिभिजन वन कार्यालयनजिकै यात्रुवाहक बस र ईभी हायस एकापसमा ठोक्किँदा भारतको पश्चिम बंगाल राज्यको मिधिनिपुरका ४० वर्षीय शंकरको मृत्यु भएको हो । हायसमा सवार नौजना घाइते रहेका जिल्ला प्रहरी कार्यालय नवलपरासी (बर्दघाट–सुस्तापूर्व)का प्रहरी उपरीक्षक यादव ढकालले बताए ।

काठमाडौंबाट दाङ जाँदै गरेको रा१ख ३३६१ नम्बरको बस र बुटवलबाट काठमाडौं जाँदै गरेको प्र ०१–००६ ख ७८०८ नम्बरको ईभी हायस एकापसमा ठोक्किएका हुन् । हायसमा सवार सबै यात्रु भारतको मिधिनिपुरका रहेका र स्थानीय अस्पतालमा उनीहरूको उपचार भइरहेको प्रहरीले जनाएको छ ।