एजेन्सी । चीनले अमेरिकाले सैन्य कटौतीको नेतृत्व लिनुपर्ने बताएको छ । 

अमेरिकी राष्ट्रपति डोनाल्ड ट्रम्पले रुस र चीनसँग सैन्य खर्च कटौती विषयमा वार्ता गर्न चाहेको टिप्पणी गरेपछि बेइजिङले शुक्रबार अमेरिकाले नै यस कार्यमा नेतृत्व लिनुपर्ने बताएको हो ।

अन्तर्राष्ट्रिय सञ्चार माध्यमका अनुसार बिहीबार ओभल कार्यालयमा ट्रम्पले सैन्य बजेट आधा कटौती गर्न प्रस्ताव गरेपछि यसको जवाफमा चिनियाँ विदेश मन्त्रालयले अमेरिकासँग विश्वको सबैभन्दा ठूलो सैन्य बजेट रहेको र उसबाटै कतौटी शुरु गर्नुपर्ने बताएको छ । 

संयुक्त राज्य अमेरिकाले ‘अमेरिका फस्र्ट’ का लागि आह्वान गरेदेखि उनीहरूले सैन्य खर्च कटौतीको उदाहरण स्थापित गर्न नेतृत्व लिनुपर्ने विदेश मन्त्रालयका प्रवक्ता गुओ जियाकुनले बताए । उनले चीनको सैन्य बजेट खुला र पारदर्शी रहेको पनि बताए । प्रवक्ता गुओले  चीनले सधैँ आफ्नो आणविक शक्तिलाई राष्ट्रिय सुरक्षाका लागि आवश्यक न्यूनतम स्तरमा कायम राख्ने र कुनै पनि देशसँग हतियार दौडमा संलग्न नहुने पनि स्पष्ट पारेको समाचारमा उल्लेख छ ।