काठमाडौँ । राप्रपा सांसद ज्ञानबहादुर शाहीले राष्ट्रिय सभाका काम(कारबाही र सदस्यहरूबारे दिएको अभिव्यक्तिप्रति खेद प्रकट गरिएको छ । सांसद शाहीले सामाजिक सञ्जालमा अत्यन्त गैरजिम्मेवारपूर्ण ढंगले आफ्ना धारणा व्यक्त गरेको भन्दै राष्ट्रिय सभाको आइतबारको बैठकले खेद प्रकट गरेको हो ।

सांसद शाहीले ‘राष्ट्रिय सभा वृद्धाश्रम’ भएको भनी सामाजिक सञ्जालमा टिप्पणी गरेका थिए । सांसद शाहीले कपोकल्पित, झूट सम्प्रेषण गरेको भन्दै आइन्दा विचार पुर्‍याउन सभाले निर्देशनसमेत दिएको छ ।

‘पारित विधेयकका सम्बन्धमा यथार्थ अवस्था अध्ययन नै नगरी निज माननीय सदस्यले कपोकल्पित, झूट र यथार्थभन्दा बाहिर गई एक सभाको सदस्यले अर्को सभाको कामकारबाही र सभाका माननीय सदस्यहरूको योग्यता, क्षमता र उमेरका सम्बन्धमा समेत अत्यन्त गैरजिम्मेवारपूर्ण ढंगले आफ्नो धारणा व्यक्त गर्नुभएको देखिएकाले उक्त अभिव्यक्तिप्रति यो सभा खेद प्रकट गर्दछ,’ सभाको निर्देशनमा भनिएको छ, ‘आइन्दा आफ्ना विचार सम्प्रेषण गर्दा सुझबुझपूर्ण, वस्तुनिष्ठ र तथ्यपरक हुन निज माननीय सदस्यलाई यो सभा निर्देशनसमेत दिन्छ ।’

आइतबारको बैठकमा राष्ट्रिय सभाको काम-कारबाहीका सम्बन्धमा सामाजिक सञ्जाल फेसबुकमा व्यक्त टिप्पणीबारे कुरा उठाएपछि राष्ट्रिय सभाले गम्भीर ध्यानाकर्षण भएको जनाउँदै खेद प्रकट गरेको हो ।