काठमाडौं । भारतको कलिंगा इन्स्टिच्यूट अफ इन्डस्ट्रियल टेक्नोलोजी (केआईआईटी) मा अध्ययनरत एक जना नेपाली विद्यार्थी होस्टलमा मृत अवस्थामा फेला परेकी छन् ।

ओडिसाको भुवनेश्वरस्थित कलेजको होस्टलमा बसेर बी–टेक तेस्रो वर्षमा अध्ययनरत बुटवलकी प्रकृति लम्साल मृत अवस्थामा भेटिएकी हुन् ।

विश्वविद्यालयले एक विज्ञप्ति जारी गर्दै लम्सालले आत्महत्या गरेको जनाएको छ । “बी-टेक तेस्रो वर्षमा अध्ययनरत एक नेपाली विद्यार्थीले हिजो होस्टेलमा आत्महत्या गरेकी छन् । उक्त विद्यार्थीको केआईआईटीमा अध्ययनरत अर्का विद्यार्थीसँग प्रेम सम्बन्ध रहेको आशङ्का गरिएको छ । कुनै कारणले गर्दा विद्यार्थीले आत्महत्या गरेको हुनसक्ने आशङ्का गरिएको छ,” विज्ञप्तिमा भनिएकाे छ ।

विश्वविद्यालय परिसरमा सहपाठीले घटनाकाे अनुसन्धान गर्न माग गर्दै प्रदर्शन गरेका छन् ।