काठमाडाैं । बलिउड अभिनेत्री कंगना रनौतको जनवरी १७ मा प्रदर्शनमा आएको फिल्म ‘इमर्जेन्सी’ ले बक्स अफिसमा खासै चमत्कार गर्न सकेन । तर नेटफ्लिक्समा रिलिज भएपछि यसले धेरै प्रशंसा पाइरहेको छ ।

यसैबीच अभिनेत्रीले विवादास्पद अभिव्यक्ति दिएकी छन्।

नेटफ्लिक्समा फिल्म हेरेपछि दर्शकहरुले फिल्म ओस्करमा पठाउनुपर्ने भन्दै तारिफ गरेका छन् । यसको जवाफमा कंगनाले अमेरिकामाथि आक्रोश पोख्दै ओस्करलाई मूर्खहरूको पुरस्कार भनेकी हुन् ।

कंगनाले इन्स्टाको स्टोरी सेक्सनमा फिल्मले पाएको प्रशंसाको स्क्रिनसट पोस्ट गरेकी छन् । यसमा एक जना प्रयोगकर्ताले भारतको तर्फबाट उनको फिल्मले ओस्कर जित्नुपर्ने तर्क राखेका छन् । तारिफ गर्दै ती प्रयोगकर्ताले ‘गज्जबको फिल्म, टिम कंगना !’ लेखेका थिए ।

यसको जवाफमा कंगनाले लेखेकी छिन्, ‘तर अमेरिकाले आफ्नो वास्तविक अनुहार हेर्न चाहँदैन, यसले विकासशील देशहरूलाई कसरी धम्की दिन्छ, दबाउँछ र दबाब दिन्छ । यो सबै ‘इमर्जेन्सी’बाट प्रकाशमा आएको हो । त्यो मूर्ख ओस्कर आफैं राख् । हामीसँग नेसनल अवार्ड छ ।’