काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ललितपुरको लाकुरीभञ्ज्याङस्थित टेरेस रिसोर्टमा लडेर घाइते भएका खुलेको छ ।

स्रोतका अनुसार मंगलबार राति प्रचण्ड केही व्यक्तिहरूसँग सो रिसोर्टमा बसेका थिए । त्यहीँ लडेर टाउकोमा चोट लागेपछि उनलाई मेडिसिटी अस्पताल लगिएको थियो ।

अस्पतालमा उपचारपछि टाउकोमा तीनवटा टाँका लगाइएको र त्यसपछि उनी घर फर्किएको जनाइएको छ ।

यता प्रचण्डको सचिवालयले उनलाई बाथरुममा लडेर चोट लागेको जानकारी दिएको छ, तर कुन स्थानको बाथरुम भन्नेबारे स्पष्ट उल्लेख गरेको थिएन ।

उनकी छोरी गंगा दाहालले फेसबुकमार्फत बाथरुममा लडेर चोट लागेको र टाउकोमा टाँका लगाइएको पुष्टि गरेकी थिइन् ।