काठमाडौं । प्रधानमन्त्री केपी शर्मा ओलीले मन्त्रिपरिषद् बैठक बोलाएका छन्। सोमबार बैठक डाकेर स्थगित गरेका ओलीले आज सत्तासाझेदार नेपाली कांग्रेसका सभापति शेरबहादुर देउवालाई भेटेलगत्तै मन्त्रिपरिषद् बैठक बोलाएका हुन्। बैठक ६ बजे बस्ने बताइएको छ।

मन्त्रिपरिषद् बैठकअघि नेपाल राष्ट्रबैंकको गभर्नर सिफारिस समितिको बैठक बस्नेछ। ओली-देउवाको आजको छलफलमा अर्थमन्त्री विष्णु पौडेल र रमेश लेखक पनि सहभागी थिए। उक्त छलफलपछि अपराह्न ४ बजे बस्ने गरी अर्थमन्त्री पौडेलले सिफारिस समितिको बैठक डाकेका छन्।

आजको मन्त्रिपरिषद् बैठकबाट गभर्नर नियुक्तिको निर्णय हुने सम्भावना छ। बालुवाटार स्रोतअनुसार सभापति देउवाकै प्रस्तावअनुसार निर्णय गर्न प्रधानमन्त्री ओली तयार भएका छन्। ‘अब टुंगिने तिर गएको छ,’ बालुवाटार स्रोत भन्छ।

कांग्रेसले विश्व पौडेललाई गभर्नर बनाउन प्रस्ताव गरेको छ। पौडेलले गभर्नर बन्नकै लागि सिफारिस समितिबाट राजीनामा दिइसकेका छन्।