काठमाडौं । सुदूरपश्चिम प्रदेश प्रमुख नजिर मियाँले कर्णाली प्रदेशकाे प्रदेश प्रमुखको कार्यभार सम्हालेका छन् ।  

कर्णाली प्रदेशका प्रमुख यज्ञराज जाेशी उपचारका लागि अमेरिका प्रस्थान गरेपछि मियाँले आइतबार प्रमुखकाे कार्यभार सम्हालेका हुन् । आँखाकाे उपचार गर्न प्रदेश प्रमुख जाेशी अमेरिका जानुपर्ने भएपछि संघीय मन्त्रिपरिषद् बैठकले मियाँलाई कर्णालीकाे जिम्मेवारी दिने निर्णय गरेकाे थियाे ।

यसैबीच, कार्यवाहक प्रदेश प्रमुख मियाँलाई नेपाल मुस्लिम आयाेगले प्रतिवेदन बुझाएको छ । आयाेगका अध्यक्ष माेहम्मद दिनले कार्यवाहक प्रदेश प्रमुख मियाँसमक्ष आयोगले आर्थिक वर्ष २०८०/०८१ मा गरेका  कामकाे प्रतिवेदन बुझाएका हुन् ।