विराटनगर । कोसी सरकारले तीनपांग्रे सिटी रिक्सा चलाउने चालकलाई चालक अनुमतिपत्र (लाइसेन्स) दिन परीक्षा सञ्चालन निर्देशिका स्वीकृत गरेको छ । कोसी मन्त्रिपरिषद्को सोमबार बसेको बैकठले परीक्षा सञ्चालन सम्बन्धमा परीक्षा सञ्चालन निर्देशिका, २०८२ स्वीकृत गरेको हो ।

सरकारका प्रवक्ता तथा आन्तरिक मामिला तथा कानुनमन्त्री रेवतीरमण भण्डारीले परीक्षा प्रणालीलाई थप व्यवस्थित गर्दै सिटी रिक्सा चलाउनेलाई लाइसेन्स दिन नयाँ प्रबन्ध गरिएको बताए ।

उनका अनुसार, बैठकले भौतिक पूर्वाधार विकास मन्त्रालयबाट मन्त्रालयको संगठन तथा व्यवस्थापन प्रतिवेदन प्रदेश सरकारको राजनीतिक तथा प्रशासनिक समितिमा अध्ययनका लागि पठाउने निर्णय पनि गरेको छ । यस्तै, आठौँ तहका कर्मचारीको बढुवा सम्बन्धमा उच्च अदालत विराटनगरको फैसलाले जवाफ मागेकाले प्रदेश लोकसेवामार्फत जवाफ पठाउने, ताप्लेजुङको धुङ्सा खोलामा ‘जनताको लगानी’ शीर्षकमा ५ प्रतिशत लगानी गर्ने निर्णय बैठकले गरेको छ ।

बैठकले धनकुटा जिल्ला अस्पताल मनमोहन प्राविधिक विश्व विद्यालयमा हस्तान्तरण गर्न नीतिगत निर्णय गरेको छ ।

यसैगरी, प्रदेश जनस्वास्थ्यसम्बन्धी नीतिमा सम्बन्धित विषयगत समितिमा पठाउने र खोटाङ जिल्ला अस्पताललाई ५० शय्याको बनाउने निर्णय गरिएको छ ।