काठमाडौँ । बेलायतमा मुख्यालय रहेको सूचना प्रविधि सम्बन्धी परामर्शदाता कम्पनी जेनिस सलुशनले नेपाल प्रहरीका वरिष्ठ अधिकृतहरुलाई साइबर सुरक्षा सचेतना तथा अन्तरक्रिया कार्यशाला आयोजना गरेको छ । बढ्दो साइबर जोखिमबारे जानकारी दिन उक्त कार्यशाला आयोजना गरिएको हो ।

नेपाल प्रहरीको नेतृत्व तहलाई साइबर खतरा र विकसित परिदृश्यबारे बुझाउन आयोजना गरिएको उक्त कार्यशालामा राष्ट्रिय महत्वका पूर्वाधार तथा संवेदनशील कानून कार्यान्वयनसम्बन्धी डेटाको सुरक्षा रणनीतिबारे अन्तरक्रिया गरिएको थियो ।

जेनेस सलुशनका ग्लोबल सिटिओ तथा सिआइएसओ निरञ्जन कुँवरले नेतृत्वमा सञ्चालन भएको उक्त कार्यशालामा एड्भान्स पर्सिस्टेन्ट थ्रेट्स (ब्एत्क्), र्यानसमवेयर र आन्तरिक खतराहरुले विश्वभरिका सुरक्षासम्बन्धी निकायहरुमा पारेको प्रभावबारे विस्तृतमा चर्चा गरे । उनले अमेरिकाको न्यूजर्सीमा प्रहरी विभागहरुलाई ठप्प बनाउने र्यानसमवेयर आक्रमणदेखि बंगलादेशमा भएका साइबर डिफेसमेन्टसम्मका वास्तविक घटनाका आधारमा साइबर आक्रमणले पार्न सक्ने आर्थिक, संस्थागत र सञ्चालनगत जोखिमबारे प्रस्ट पारे ।

कुँवरले संकट व्यवस्थापन, योजना विकास, सुरक्षाप्रति सचेत संस्थागत संस्कृति निर्माण तथा साइबर सुरक्षामा लगानीजस्ता विषयहरुमा चर्चा गरेका थिए । कार्यशालामा वरिष्ठ अधिकृतहरुले र्यानसमवेयरले मुख्य प्रणालीहरुलाई लक्षित गर्दा कसरी तत्काल प्रतिक्रिया दिने भन्ने अभ्यास पनि गरेका थिए ।

प्रविधिमा आधारित उपायसँगै कार्यशालाले सामाजिक इञ्जिनियरिङ र डीपफेक जस्ता प्रविधिमा आधारित छलहरुको विरुद्धमा मानवीय क्षमता विकासको आवश्यकता पनि औंल्याईएको थियो । बलियो पासवर्डको प्रयोग, दुई तहको प्रमाणीकरण र सतर्क अनलाइन अभ्यासहरु अपनाउनुपर्ने कुरामा जोड दिईएको थियो । उक्त कार्यशालालाई नेपाल प्रहरीको साइबर तयारी सुदृढ गर्ने दिशामा एक महत्वपूर्ण कदमका रूपमा लिईएको छ र यसले बदलिँदो डिजिटल परिदृश्यमा राष्ट्रिय हित सुरक्षाका लागि नेतृत्व तहको प्रतिबद्धतालाई थप बलियो बनाएको छ ।