काठमाडाैं । उच्च अदालत जनकपुरको वीरगञ्ज इजलासका न्यायाधीश डा.खुशीप्रसाद थारुमाथि इजलासमै मोसो प्रहार भएको छ।

अफताब आलमलाई सफाइ दिएको भन्दै क्रान्तिकारी युवा संगठन, नेपाल नामक संगठनका व्यक्तिले बिहीबार दिउँसो इजलासमै पुगेर यसरी मोसो प्रहार गरेका हुन् । मोसो दलेर उनीहरुले नेकपा बहुमत जिन्दावाद भन्दै नारा समेत लगाएका थिए।

पहिलो संविधान सभा निर्वाचनको अघिल्लो दिन २०६४ चैत २७ गते रौतहटमा आफ्नो घरमा बम विस्फोटमा परेका घाइतेहरूलाई जिउँदै इँटाभट्टामा लगेर जलाएको अभियोगमा जिल्ला अदालतबाट आलम दोषी ठहर भएका थिए।

जेठ १४ गते उच्च अदालत जनकपुरको वीरगन्ज इजलासले उक्त घटना नै नभएको भन्दै सफाइ दिएको थियो। त्यसलगत्तै आलम नख्खु कारागारबाट रिहा भएका थिए।