काठमाडौं ।गुजरातका पूर्व मुख्यमन्त्री विजय रूपाणीको अहमदाबादमा बिहीबार भएको एयर इण्डिया विमान दुर्घटनामा निधन भएको छ।

उक्त विमान सरदार वल्लभभाई पटेल अन्तर्राष्ट्रिय विमानस्थलबाट लन्डनका लागि उडान भरिरहेको थियो। विजय रूपाणी आफ्नी छोरीलाई भेट गर्न लन्डन जाँदै थिए।

केन्द्रीय मन्त्री सीआर पाटिलले पूर्व मुख्यमन्त्री रूपाणीको मृत्यु भएको पुष्टि गरे । भारतीय जनता पार्टी (भाजपा) गुजरातका प्रमुख समेत रहेका पाटिलले पूर्व मुख्यमन्त्री रूपाणीको निधनप्रति शोक व्यक्त गर्दै भने, “उहाँ आफ्नो परिवारसँग भेट गर्न जाँदै हुनुहुन्थ्यो, तर यो दुःखद दुर्घटनामा परी जानुभयो। भगवानले उहाँको आत्मालाई शान्ति प्रदान गरून्।”

भारतीय सञ्चारमाध्यमका अनुसार पूर्व मुख्यमन्त्री रूपाणीकी पत्नी लन्डनबाट र छोरा अमेरिकाबाट अहमदाबाद आउँदै छन्। उक्त विमानमा १२ जना चालकदलसहित कुल २४२ जना यात्रु सवार थिए।

दुर्घटनाग्रस्त विमानमा १६९ भारतीय, ५३ बेलायती, ७ पोर्तुगीज र १ जना क्यानाडाली नागरिक सवार थिए। दुर्घटना अहमदाबादको मेघाणी नगर क्षेत्रमा भएको हो । विमानमा सवार एक जनालाई जीवितै उद्धार गरिएको छ ।