इरान । कोम प्रान्तीय संकट व्यवस्थापन मुख्यालयका प्रवक्ता मोर्तेजा हेयदारीले अमेरिकी आक्रमणपछि फोर्डो आणविकस्थल रहेकाे काेम सहरकाे अवस्था शान्तिपूर्ण रहेकाे बताएका छन् ।

कोममा इरानकाे तस्निम समाचार एजेन्सीसँग कुरा गर्दै प्रवक्ता हेयदारीले भने: “जसरी कोम शहर हालैका दिनहरूमा पूर्ण शान्तिमा रहेको छ र आज पनि मानिसहरू आफ्नो सामान्य जीवनमा व्यस्त छन् । त्यसरी नै उनीहरूले अफवाहहरूको पर्वाह नगरी शान्तिपूर्वक आफ्नो जीवन बिताउन जारी राख्नु पर्छ।” फोर्डो आणविक स्थलमा बिहान भएको आक्रमणलाई उल्लेख गर्दै उनले थपे: “कोम प्रान्तका सम्माननीय र साहसी जनताले कुनै चिन्ता लिनु पर्दैन र उनीहरूलाई कुनै खतरा छैन।”

कोम गभर्नरेटका उप-राजनीतिक तथा सुरक्षा अधिकारीले भने: “शत्रुहरूले मनोवैज्ञानिक युद्ध खोजिरहेका छन् र अफवाह फैलाएर जनताको शान्तिलाई खलल पारिरहेका छन्, तर हाम्रा सम्माननीय जनता शत्रु मिडियाको झूटमा ध्यान दिन धेरै सतर्क छन्।” प्रान्तको वर्तमान अवस्थालाई उल्लेख गर्दै प्रवक्ता हेयदारीले पुरै प्रान्त र पवित्र शहर कोम पूर्ण शान्तिमा रहेकाे र मानिसहरूको जीवन सामान्य रूपमा चलिरहेको बताए ।

उनले थप भने, “केही घण्टा अघि, कोमको हवाई प्रतिरक्षा सक्रिय भएपछि र शत्रुतापूर्ण लक्ष्यहरू पहिचान गरिएपछि, फोर्डो आणविक स्थलको एक भागमा शत्रुको वायु सेनाले आक्रमण गरेको थियाे । ” प्रवक्ता हेयदारीले मानिसहरूलाई अफवाहहरूमा ध्यान नदिन आग्रह गर्दै आधिकारिक स्रोतहरूबाट भरपर्दो समाचार र सूचनामात्रै विश्वास गर्न आग्रह गरेका छन् ।