धनुषा। धनुषा जिल्लाको विदेह नगरपालिका–२ स्थित गोबराही ईलाकामा असार १९ गते तस्कर समुहसंगको झडपमा ६ जना सशस्त्र प्रहरी घाइते भएका छन् ।

सोही ईलाकामा अन्दाजी मोटरसाईकलमा अबैध सामानहरु लुकाई छिपाई राखिएको भन्ने सूचनाको आधारमा सशस्त्र प्रहरी बल, नेपाल नं. ८ गण धनुषा र प्रस्तावित सीमा सुरक्षा गुल्म महिनाथपुरबाट खटिएको टोलीले अबैध सामान खोजतलास गर्ने क्रममा एक वटा मोटरसाईकल फेला पारेको थियो ।

साथै नजिकै रहेको टहरोमा समेत खोजतलास गर्ने क्रममा अन्दाजी १००र१५० जनाको संख्यामा लुखिछिपी बसेका ती व्यक्तिहरुले घरेलु हातहतियारसहित सशस्त्र प्रहरीमाथि ढुङ्गामुढा प्रहार गरेका थिए ।

सोही क्रममा ६ जना सशस्त्र प्रहरी कर्मचारीहरु घाईते भएका छन् भने स्थित नियन्त्रणको लागि सशस्त्र प्रहरीले १३ राउण्ड ग्यास सेल र ४ राउण्ड हवाई फायर समेत गरेको थियो । घाइते भएकाहरुमध्य ३ जना सशस्त्र प्रहरी कर्मचारीहरुलाई उपचारको लागि प्रादेशिक अस्पताल जनकपुरतर्फ लगिएको छ भने ३ जनाको अवस्था सामान्य रहेको प्रहरीले जनाएकाे छ ।