काठमाडौं । नवनियुक्त शिक्षा, विज्ञान तथा प्रविधिमन्त्री महावीर पुनले मन्त्रालयमै बसेर काम गर्ने बताएका छन् । मन्त्री पुनले सोमबार शपथग्रहणपछि पत्रकारहरूसँग कुरा गर्दै पुनले आफूलाई बस्नका लागि छुट्टै क्वाटर नचाहिने बताएका छन् ।

‘मलाई मन्त्री क्वार्टर चाहिन्न, सचिवज्युलाई अहिले नै के निर्देशन दिन चाहान्छु भने यहाँ एउटा कोठा बनाउनुहोस्,’ पुनले भने, ‘त्यहाँ एउटा बेड भए पुग्छ। जहाँ काम गर्‍याे यो, त्यही बस्ने बानी छ मेरो। एउटा कोठा बनाउनुस् । मन्त्रालयमै बस्छु । एउटा कुर्सी चाहिन्छ । किचन चाहियो । आफैं पकाएर खान्छु ।’

उनले आफूलाई सुरक्षा पनि नचाहिने बताए ।

पुनले भने,‘सेवा सुविधा के छ भने त्यहाँबाट आउँदा एउटा पुलिसको र एउटा आर्मीको रहेछ । मैले भाइहरुलाई भनेको छु । रिपोर्ट गर्नु कमाण्डरहरुलाई । म यो मन्त्रालयमा छँदा यहीँ बसौं । यहाँबाट बाहिर निस्किएपछि पछिपछि आउनु पर्दैन ।’