काठमाडौं । आईसीसी टी–२० विश्वकप एशिया छनोट तथा इस्ट प्यासिफिक छनोटको सुपर–सिक्सको आफ्नो अन्तिम खेलमा नेपालले सामोआलाई २१२ रनको विशाल लक्ष्य दिएकाे छ ।

टस हारेर पहिला ब्याटिङकाे निम्ताे पाएकाे नेपालले निर्धारित २० ओभरमा ४ विकेट गुमाएर २११ रन बनाएको हो। नेपालले आसिफ शेख र दीपेन्द्र सिंह ऐरीको अर्धशतककाे मद्दतमा याे विशाल लक्ष्य खडा गरेकाे हाे ।

नेपालका लागि आसिफले सर्वाधिक ६९ रनको योगदान दिए । उनले ४१ बलमा सात चौका र चार छक्का प्रहार गर्दै ६९ रनको योगदान दिएका हुन् । त्यसैगरी ऐरीले ५३ रन बनाए । उनले ३३ बलमा दुई चौका र चार छक्काको मद्दतमा ५३ रन जोडेका हुन् । त्यसैगरी लोकेश बमले ३९ रन जोड्दा कप्तान रोहित पौडेलले अविजित २१ रन बनाए । कुशल भुर्तेलले १७ रन जोडेर आउट भए ।

यता सामाओका लागि ड्यानियल बर्गेस, सौमानी टाई, ड्यारियस भिसर, नुह मिडले समान एक–एक विकेट लिए । सामोआ अहिले जवाफी ब्याटिङमा उत्रेको छ ।