काठमाडाैं । पोखरा एभेन्जर्सले नेपाल प्रिमियर लिग (एनपिएल) को दोस्रो संस्करणका लागि इंग्ल्यान्डका अनुभवी विकेट किपर तथा ब्याटर एडम रोसिङटनलाई अनुबन्ध गरेको छ।

मंसिर १ गते सुरु हुने एनपिएलका लागि टोलीले आफ्नो शीर्ष–क्रम बलियो बनाउने उद्देश्यसहित ३२ वर्षीय रोसिङटनलाई टोलीमा समावेश गरिएको पोखराले जनाएको छ। रोसिङटनले नेपालमा पहिलो पटक खेल्न लागेका हुन् ।

मिडलसेक्सबाट खेल जीवनको सुरुवात गरेका उनले नर्थह्याम्पटनसायर र एसेक्सबाट पनि खेले । काउन्टी क्रिकेटमा उनले एक सयभन्दा बढी पहिलो श्रेणी खेल खेलेका छन् भने टि ट्वान्टी फार्मेटमा सयौँ खेल खेलेका छन् ।‌

रोसिङटनसँग विश्वभरका प्रमुख टि ट्वान्टी लिगको अनुभव छ। पोखरा एभेन्जर्सले रोसिङटनको अनुभव र आक्रामक ब्याटिङले टोलीको प्रदर्शनमा नयाँ उचाइ ल्याउने विश्वास गरेको छ ।