काठमाडौं ।  राष्ट्रिय स्वतन्त्र पार्टीका सभापति रवि लामिछानेले सहकारी ठगी, संगठीत अपराध र सम्पत्ति शुद्धिकरणको मुद्दामा हालसम्म चार वटा अदालतमा गरी जम्मा ५ करोड २७ लाख रुपैयाँ धरौटी बुझाइसकेकाे तथ्याङ्कले देखाएको छ । 

रवि लामिछानेले कास्की अदालतमा  सूर्यदर्शन सहकारीकाे घाेटाला प्रकरणमा ६५ लाख रुपैयाँ, काठमाडौँमा स्वर्णलक्ष्मी सहकारी घाेटाला प्रकरणमा ६० लाख रुपैयाँ, चितवन अदालतमा सहारा सहकारी घाेटला प्रकरणकाे  ५४ लाख रुपैयाँ र शुक्रबारमात्रै उच्च अदालत, बुटवलमा सुप्रिम सहकारीको ठगि प्रकरणमा ३ करोड ४८ लाख रुपैयाँ धराैटी बुझाएका छन् ।

यी सबै रकम जाेड्दा उनले बुझाएको धराैटी रकममात्रै ५ कराेड २७ लाख हुन आउँछ ।पर्सा जिल्ला अदालतमा पनि उनी विरुद्ध सहकारी ठगीकाे मुद्दा चलिरहेको छ ।

लामिछानेले बुझाएको ठुलाे रकमकाे स्राेतबारे सर्वसाधारणदेखि नेतासम्मले प्रश्न गर्न थालेका छन् ।  श्रम संस्कृति पार्टीका अध्यक्ष हर्क साम्पाङले  रास्वपाका सभापति रवि लामिछानेलाई धरौटी बुझाउने २ करोडको स्रोत खुलाउन शुक्रबार  आग्रह गरेका छन् ।

साम्पाङले सामाजिक सञ्जालमा लेख्दै लामिछानेलाई अदालतमा बुझाउने २ करोडको स्रोत खुलाउन आग्रह गरेका हुन् । उनले भनेका छन्-‘बुझाइने २ करोडको स्रोत खुलाउनु होला! जय सुशासन!’