काठमाडाैं । एनआईसी एशिया बैंकले आफ्नो नाममा रहेका बैंकिङ सम्पत्तिहरू, गैरबैंकिङ सम्पत्ति तथा धितो सुरक्षणमा रहेको सम्पत्तिसमेतको लिलाम बिक्रीसम्बन्धी जानकारी एक अनलाइन पोर्टलमा राखेको छ ।

बैंकले यसअघि नै सार्वजनिक गरिसकेको उक्त पोर्टलमा बैंकले लिलाम बिक्री गर्ने सम्पत्तिहरूसम्बन्धी सम्पूर्ण सूचनाहरू उपलब्ध गराइएको बताएको छ ।

विस्तृत जानकारी लिनका लागि ग्राहकहरूले उक्त पोर्टलमा राखिएको सूचनामा रहेको क्यूआर कोड स्क्यान गरी आउने पोर्टलमा लिलाम बिक्रीमा रहेका सम्पत्तिहरूको कित्ता नं. तथा क्षेत्रफलसहितको विवरण, फोटो, नक्सा एवं उक्त सम्पत्तिको स्थान (लोकेसन) पहिचानका लागि गुगल म्यापसहितका विविध जानकारीहरू प्राप्त गर्न सकिने बैंकले जनाएको छ ।

यसरी ग्राहकहरूले बैंकले लिलाम बिक्रीमा राखेको सम्पत्तिका सम्बन्धमा खरिद गर्न चाहेको सम्पत्तिको बारेमा थप जानकारी लिन आवश्यक भएमा सोही सम्पत्ति विवरण रहेको ठाउँमा उपलब्ध म्यासेज बक्समा आफ्नो पूरा नाम, इमेल ठेगाना, मोबाइल नम्बर, सम्पर्क ठेगाना राखी म्यासेजसमेत पठाउन सकिने व्यवस्थासमेत गरिएको बैंकले बताएको छ ।