काठमाडौं । नेकपा (एमाले) का अध्यक्ष तथा पूर्व प्रधानमन्त्री केपी शर्मा ओलीले भिडियो सन्देश जारी गरेका छन् । उनले आफू नेतृत्वको निर्वाचित सरकारलाई अपदस्त गराई देशमा विध्वंश मच्चाईएको टिप्पणी गरेका छन् ।

ओलीले प्रतिनिधिसभा विघटन गरेर अहिले त्यही प्रतिनिधिसभाको निर्वाचन हुन लागेको भन्दै देश बचाउनको लागि ठण्डा दिमागले सोच्न आग्रह गरेका छन् ।

अब जनताले एउटा बाटो रोज्नुपर्ने उनले बताए। ‘आज तपाईंले एउटा बाटो रोज्नुपर्नेछ, बनाउने बाटो कि भत्काउने ? निर्माणको कि ध्वंशको बाटो ?’ उनले भने, ‘मलाई थाहा छ थुप्रै भ्रमहरु फैलाईएका छन् । तपाईंसँग मप्रति गुनासा पनि छन् । प्रश्न पनि छन् । मेरा कमिकमजोरी पनि होलान् । तर, तपाईंहरुलाई यो पनि थाहा छ कि मैले यस देशको अखण्डताको सवालमा, यस देशको स्वाभिमानको सवालमा, यस देशको राष्ट्रियताको सवालमा कसैसँग कहिल्यै सम्झौता गरेको छैन । र, गर्दिनँ ।’

ओलीले अब स्पष्ट कित्ताकाट गर्ने बेला आएको बताएका छन्। ‘…तपाईं राष्ट्र जोगिनुपर्छ भन्ने पक्षमा कि राष्ट्रको भविष्य जे भए होस् भन्ने पक्षमा ? यतिबेला तपाईँले आफू कुन कित्तामा हो भनेर स्पष्ट पार्नुभएन र त्यसको लागि बोल्नुभएन भने इतिहासले होइन, तपाईं आफैँले आफैँलाई कहिल्यै माफ गर्नुहुने छैन ।’

हेर्नुहाेस् भिडियाे :