काठमाडौँ । प्रतिनिधिसभाका नवनिर्वाचित सदस्यहरूको शपथग्रहण यही चैत १२ गते हुने भएको छ ।

बिहीबार संघीय संसद सचिवालय सिंहदरबारमा नयाँ प्रतिनिधिसभामा प्रतिनिधित्व गर्ने ६ दलसँग छलफलपछि सांसदहरुको शपथको मिति तय गरिएको हो ।

शपथ ग्रहण गराउनु अगाडि ज्येष्ठ सदस्यको पहिचान गर्ने र ज्येष्ठ सदस्यले राष्ट्रपतिसँग शपथ ग्रहण गर्ने जनाइएकाे छ। राष्ट्रपतिसँग शपथ ग्रहण गरेपछि ज्येष्ठ सदस्यले अन्य सदस्यहरूलाई शपथ खुवाउने कार्यसुची छ ।

फागुन २१ मा भएको प्रतिनिधिसभा निर्वाचनबाट ६ पार्टीले राष्ट्रिय दलको मान्यता पाएका छन् ।