काठमाडौं । नेपाल प्रहरीको विशेष ब्यूरोले राजधानिस्थित हायात होटलको पार्किङस्थलबाट युरेनियमजस्तो देखिने पदार्थसहित आठ जनालाई पक्राउ गरेको छ ।

प्रहरीको विशेष ब्युरो र महानगरीय प्रहरी वृत्त बौद्धको संयुक्त टोलीले युरेनियमजस्तो देखिने पदार्थसहित हायात होटलको पार्किङ क्षेत्रबाट ८ जनालाई पक्राउ गरेको हो ।

प्रहरीले सिराहा लक्ष्मिपुर पतरी गाउँपालिका घरभई हाल ठमेल बस्ने गोपिलाल दास, सिन्धुपाल्चोक हेलम्भु घरभई हाल बौद्ध माहाँकाल बस्ने रामकृष्ण लामिछाने, कपनका भुपेन्द्र खडका, ललितपुरका नवराज महत, सिरहाकै बरियापट्टी घरभई ठमेल बस्ने जिवछ नारायण यादब र महोत्तरी भई गोकर्णेश्वरको शिबचोक बस्ने सुरेन्द्र प्रसाद चौधरीलाई नियन्त्रणमा लिएको छ ।

सोमबार साँझ साढे पाँच बजे उनीहरूको साथबाट दुई किलो ८ सय ग्राम युरेनियमजस्तो देखिने पदार्थ बरामद भएको बौद्ध प्रहरीका एक अधिकारीले जानकारी दिए ।

युरेनियमजस्तो देखिने पदार्थसहित उनीहरूलाई नियन्त्रणमा लिएको ति प्रहरी अधिकारीले मेरोन्यूजलाई जानकारी दिए । उनले भने,‘विशेष ब्यूरो र बौद्ध वृत्तको संयूक्त टोलीले हिजो (सोमबार) साझ ८ जनालाई पक्राउ गरेको हो । उनिहरुलाई आज (मंगलबार) जिल्ला अदालत काठमाडौं लगिएको छ ।’

बरामद भएको युरेनियम जस्तो पदार्थ परीक्षणका लागि ल्याबमा पठाउने तयारी भइरहेको छ।

घटनाबारे प्रहरीले आधिकारिक रूपमा जानकारी भने दिएको छैन ।