काठमाडौं । नेकपा (माओवादी केन्द्र)ले संसदको अवरोध कायमै रहेका बेला अमेरिकी सहयोग नियोग मिलेनियम च्यालेन्ज कर्पाेरेसन एमसीसी सम्झौता सदनमा लैजान नदिने भएको छ । संसदको कार्यब्इवस्था परामर्श समितिमा माओवादीले सोही भूमिका निर्वाह गर्ने भएको छ ।

विहान सिंहदरवारमा बसेको संसदीय दलको बैठकले एमसीसीका विषयमा मुख्यतः तीन वटा कुरालाई उठाउने गरी छलफल चलेको उर्जामन्त्री समेत रहेकी माओवादी केन्द्रकी प्रभावशाली नेतृ पम्फा भुसालले बताइन् ।

पहिलो, विना परिमार्जन यथास्थितीमा एमसीसी पास गर्ने कुरा मानिन्न । दोस्रो, गठबन्धनभित्रका दलहरुसित पनि सहमति सकेसम्म राष्टिय सहमति नभए गठबन्धनभित्रको सहमति र तेस्रो सदन सुचारु गरेर मात्र वल्ल सदनको प्रक्रिया अगाडी वढ्छ भन्ने माओवादीको कुरा हुन्छ, भुसालले मेरोन्यूजसँग भनिन् ।

तर संसदको कार्यब्यवस्था परामर्श समितिमा सरकारको नेतृत्व गरिरहेको दल कांग्रेस र प्रधानमन्त्रीका तर्फबाट जर्वजस्त एमसीसी सदनमा लैजाने र यथास्थितीमै अनुमोदनको प्रक्रियामा लैजान चाहेमा भने माओवादीले निर्णायक स्टेप पनि लिने तयारी गरेको छ । माओवादी केन्द्रका अर्का एक नेताले मेरोन्यूजसँग भने, त्यस्तो बेला अहिले कायम रहेको गठबन्धन तोडने कुरा हुन्छ । त्यो भनेको सरकार छोडने नै हुन्छ ।

त्यस्तै माओवादीले कांग्रेसले र प्रधानमन्त्रीले जर्वजस्त गरे विपक्षमा पार्टीले मतदान गर्ने निर्णय पनि संसदीय दलको बैठकबाट गरेको छ । माओवादी प्रमुख सचेतक देव गुरुङ बैठकपछि मेरोन्यूजसँग भने, – ‘एमसीसीमा रहेका असमान शर्तहरु संशोधन नगरी यथास्थितिमा अगाडि बढाउन सकिंदैन । जबरजस्ती रुपमा ल्याए विपक्षमा मतदान गर्ने निर्णय हामीले गरेका छौं ।’