काठमाडौं । सरकारका तर्फबाट प्रतिनिधिसभा बैठकमा अमेरिकी सहयोग परियोजना एमसीसी टेबल गर्ने तयारी गरिएपछि बुधबार विहानैदेखि एमसीसीविरोधीहरु सडकमा उत्रिए ।

एमसीसी टेबल गर्ने तयारी गरिएपछि त्यसको विरोधमा ६ कम्युनिस्ट पार्टीले गरेको नेपाल बन्द सफल बनाउन सडकमा निस्किएका कार्यकर्ता प्रहरीले विहानैदेखि पक्राउ गर्न थाल्यो ।

फाट्टफुट्ट सडकमा देखिएका ६ कम्युनिस्ट पार्टीका कार्यकर्तालाई प्रहरीले धमाधम पक्राउ गरिरहँदा सत्ता गठबन्धनकै प्रमुख घटक नेकपा माओवादी केन्द्रको युवा संगठन वाईसीएल कार्यकर्ता बानेश्वरमा जम्मा भए ।

टाउकोमा ‘नो एमसीसी’ लेखिएको कालोफेता बाँधेर नाराबाजी थालेका वाईसीएल कार्यकर्तालाई नयाँ बानेश्वरको एभरेष्ट होटल अगाडिको निषेधित क्षेत्रको सीमामा नाराबाजी गरे ।

केहीेबेर नाराबाजीपछि केही युवाहरुले प्रहरीलाई जिस्क्याए । ढुंगाले हान्न थाले । उनीहरुले प्रहरीलाई ताकिताकि ढुंगा प्रहार गरेपनि प्रहरीले बल प्रयोग गरेन । पानीको फोहोराले भिड नियन्त्रण गर्न खोज्यो । वाईसीएलको आफ्नै कार्यकर्ताले हानेको ढुंगा लगेर संगठनका नेता कार्यकर्ता घाइते भए । ढुंगा हान्ने काम रोकियो ।

त्यहिबेला एमसीसीविरोधी नारा लगाउँदै राप्रपाको समूह माइतीघरबाट बानेश्वरतर्फ अघि बढ्यो । विजुलीबजार पुलमा आइपुग्दा प्रहरीले रोक्न खोजे । तर प्रहरीले रोक्न सकेन ।

राजतन्त्रको पक्षमासमेत नाराबाजी गर्दै राप्रपा कार्यकर्ता अघि बढेपछि वाई वाईसीएलको कार्यक्रम किनारा लाग्यो । छिटोछिटो कोणसभा गरेर बाहिरिएका थिए ।

अपरान्ह १२ बजेदेखि तनावपूर्ण बनेको बानेश्वर क्षेत्र अहिले पनि अशान्त छ । वाईसीएलको कार्यक्रम सकिएपछि नो एमसीसी लेखिएको कालोफेता बाँधेका युवाहरु राप्रपाको कार्यक्रममा पनि घुसपैठ गरी प्रहरीलाई जिस्क्याउन थालेपछि आन्दोलनकारीलाई पछि धकेल्यो ।

पटक पटक प्रहरीसँगको धकेलाधकेल कायमै हुँदा नेपाल बन्द गरेका ६ कम्युनिस्ट पार्टीका कार्यकर्तालाई कोेटेश्वरतर्फबाट पक्राउ गरी प्रहरीको ट्रकमा हालेर बानेश्वरतर्फ ल्यायो । राप्रपा कार्यकर्ताले बन्दकर्ता पक्राउ गरेका गाडी घेराबन्दी गरेपछि प्रहरी गाडी फर्कियो ।

राप्रपाको आन्दोलन जारी रहेकैबेला पुनः आन्दोलनकारीले प्रहरीलाई ढुंगा बर्साए । राप्रपाको कोणसभा हुँदै गर्दा फेरि फेरि आन्दोलन बिथोलियो । प्रहरीले पानीको फोहोरा मात्र होइन, अश्रु ग्याससमेत प्रहार गर्न थाल्यो । आन्दोलनकारीको प्रहरीको गाडी फुटाए । आन्दोलनकारीलाई लखेटेर तितरबितर पार्यो ।

प्रहरी र राप्रपा कार्यकर्ताको घम्साघम्सी चलिरहेको छ ।