काठमाडौँ । प्रदेशिक अस्पताल मलंगवा सर्लाहीमा जडान गरिएको अक्सिजन प्लान्ट सञ्चालनमा आएको छ । कोरोना भाइरसको संक्रमणका समयमा अक्सिजन प्लान्टको महसुस गरी गत असारको अन्तिममा सो प्लान्ट मधेश प्रदेश सरकारको सहयोगमा मलंगवा अस्पतालमा स्थापना गरिए पनि लामो समयदेखि सञ्चालनमा आएको थिएन ।

प्लान्टका लागि आवश्यक भौतिक संरचना निर्माण, पाइपलाइन जडान र विद्युतलगायतको व्यवस्थापनले अक्सिजन प्लान्ट सञ्चालनमा ढिलाई भएको प्रदेशिक अस्पताल मलंगवाका मेडिकल सुपरिटेन्डेन्ट डा. झाले बताए । प्रदेश सरकारले ५० लाखमा खरिद गरेर दिएको अक्सिजन प्लान्ट दैनिक २० सिलिण्डर बराबर अक्सिजन उत्पादन गरी वितरण गर्न सकिने उनले बताए ।

सिलिण्डरमा भर्नका लागि थप अक्सिजन ट्यांक राख्नु पर्ने प्रमुख झाले जानकारी दिए । मधेश प्रदेशका सामाजिक विकास मन्त्रालयका मन्त्री नवलकिशोर साहले सो प्लान्टको शुक्रबार उद्घाटन गरेका थिए ।