नेपाल बार एसोसिएसनको निर्वाचनका लागि आज उम्मेद्वारी दर्ता गर्ने कार्य तालिका रहेको छ । चैत १९ मा हुने निर्वाचनमा आज दिउँसो ११ बजेदेखि ३ बजेसम्म उम्मेद्वार मनोनयनको कार्य तालिका रहेको छ ।

उम्मेदवारको पहिलो नामावली आजै प्रकाशन गर्ने र दाबी विरोध भोलि दिउँसो २ बजेसम्म तोकिएको छ । उम्मेद्वारको अन्तिम नामावली फागुन २५ गते प्रकाशन गर्ने बारले जनाएको छ । निर्वाचनका लागि देशभर ३५ मतदान केन्द्र तोकिएको छ ।

बारमा एक अध्यक्ष, ८ उपाध्यक्ष एक महासचिव, एक कोषाध्यक्ष र १४ सदस्य छनोटको पदाधिकारी हुने व्यवस्था रहेको छ । चण्डेश्वर श्रेष्ठ नेतृत्वको समितिको तीन वर्षे कार्यकाल सकिएसँगै नयाँ नेतृत्वका लागि निर्वाचन हुन लागेको हो ।

बारको अध्यक्षमा उम्मेद्वारी दिन ५० हजार रुपैयाँ शुल्क तोकिएको छ । यसैगरी, उपाध्यक्ष, महासचिव र कोषाध्यक्ष पदका लागि ३५ हजार र सदस्यका लागि २५ हजार रुपैयाँ मनोनयन शुल्क तोकेको छ ।