काठमाडौँ । संखुवासभाको मादी नगरपालिका ६ मा भएको बस दुर्घटनामा थप एक जनाको मृत्यु भएको छ । योसँगै घटनामा मृत्यु हुनेको संख्या १५ पुगेको छ ।

मृत्यु हुनेमा मादी नगरपालिका ५ की ३० वर्षकी युका पोखरेल रहेकी छन् । उनको वीपी कोइराला स्वास्थ्य विज्ञान प्रतिष्ठानमा उपचारका क्रममा मृत्यु भएको प्रहरीले जानकारी दिएको छ ।

यसअघि घटना स्थलमा १४ जनाको मृत्यु भएको थियो । मृत्यु हुनेमा मादी नगरपालिका ६ का ३८ वर्षीय इन्द्रबहादुर अधिकारी, ३० वर्षीया सीता विक, ५ वर्षीया दीक्षा कटवाल, ३२ वर्षीया अञ्जना कटवाल, मादी नगरपालिका ५ का ४५ वर्षीय दीपक दाहाल, ५२ वर्षीय श्याम शेर्पा, ५५ वर्षीय भवानी दाहाल रहेका थिए ।

यस्तै, मादी नगरपालिका ४ का अन्दाजी ३५ वर्षीय उमेश भट्टराई, ३८ वर्षीय आइतबहादुर तामाङ, ३५ वर्षीय सविता राउत कार्की, ६० वर्षीय बलबहादुर कार्की, तेह्रथुम औशीडाँडाका ३५ वर्षीय विपिन निरौला, ताप्लेजुङकी ३१ वर्षीय समीक्षा योन्जन र ताप्लेजुङकै ८ वर्षीय सुदीप घिसिङ रहेका छन् ।

दुर्घटनामा घाइते मादी नगरपालिका ५ बस्ने ३० वर्षीय सुवास गोले, मादी ६ की २२ वर्षीय तुलसा कटुवाल, अम्बिका विक, ५० वर्षीय डम्बरबहादुर कार्कीको धरानमा उपचार भइरहेको छ ।

आज बिहान मादीको ओखरबोटेबाट झापाको दमकतर्फ आउँदै गरेको बा ४ ख ७३५ नम्बरको बस दुर्घटना भएको थियो । बस सडकदेखि तीन सय मिटर तल खसेको प्रहरीले जनाएको छ ।