काठमाडौँ । कैलालीमा खतरा लेखिएको प्रेसर कुकरभित्र सुनका गहना फेला परेको छ। मंगलबार बिहान गोदावरी नगरपालिका १ बनखेतमा रहेको नवीन साहुको घरअगाडि कुकरभित्र सुनका गहना फेला परेको हो।

घरअगाडि नै शंकास्पद वस्तु फेला परेपछि साहुले प्रहरीलाई खबर गरेका थिए। सूचना पाएपछि इलाका प्रहरी कार्यालय मालाखेतीबाट प्रहरी टोली गई सेनाको बम डिस्पोजल टोली मगाएको थियो।

बम डिस्पोजल टोलीले उक्त कुकर डिस्पोज गर्दा सुनका गरगहना फेला परेको प्रहरीले जनाएको छ। गहनासँगै नवीन साहुलाई घमण्ड नगर्न र सबैसँग मिलेर बस्न सुझाव दिइएको पत्र फेला परेको छ।

नवीन साहुले गत मंसिर १४ गते राति घरबाट करिब ८ तोला सुन हराएको भन्दै प्रहरीमा निवेदन दिएका थिए।