काठमाडौँ । सत्तारुढ दल नेपाली कांग्रेसले आगामी स्थानीय तहमा अवस्था र आवश्यकताअनुसार अन्य दलसँग गठबन्धन गर्ने निर्णय गरेको छ ।

पार्टीको केन्द्रीय समितिको बैठकले गठबन्धनमा जाने नीतिगत निर्णय सर्वसम्मत रुपमा भएको प्रवक्ता डा. प्रकाशशरण महतले जानकारी दिए । नीतिगत निर्णयलाई केन्द्र, प्रदेश, जिल्ला र क्षेत्रीय समिति तहमा संयन्त्र बनाएर कार्यान्वयनमा लैजाने उनले जानकारी दिए ।

गठबन्धनमा रहेका दलको क्षमताका आधारमा तालमेल गर्ने कांग्रेसले निर्णय गरेको छ । गत शुक्रबारदेखि सानेपास्थित पार्टी केन्द्रीय कार्यालयमा बसेको बैठक मंगलबार सकिएको छ । पार्टीको अनुसासन र संसदीय समिति भने पछि बनाइने भएको छ ।

पार्टी सभापति एवं प्रधानमन्त्री शेरबहादुर देउवा भारत भ्रमणबाट फर्किएपछि थप छलफल गरेर समिति बनाउने प्रवक्ता महतले जानकारी दिए ।