काठमाडौँ । त्रिकोणात्मक टी २० अन्तर्राष्ट्रिय सिरिजअन्तर्गत आज भएको खेलमा नेपालले पपुवा न्युगिनी (पीएनजी) ३७ रनले पराजित गरेको छ ।

नेपालले दिएको २०४ रनको लक्ष्य पछ्याएको पीएनजीले १९.३ ओभर खेल्दै अल आउट भएको हो । आजको जितसँगै नेपालले एक खेलअगाडि फाइनलमा प्रवेश गरको छ ।

यस्तै, सोमपाल कामी र अभिनाश बोहोराले समान २–२ विकेट लिए भने कप्तान सन्दीप लामिछानेले एक विकेट लिए ।

त्रिवि क्रिकेट मैदान कीर्तिपुरमा भएको खेलमा टस हारेर पहिला ब्याटिङ गरेको नेपालले २० ओभरमा ७ विकेट गुमाउँदै दुई सय ३ रन बनाएको थियो । नेपालका लागि दिपेन्द्र सिंह ऐरीले अर्धसतकीय इनिङ खेल्दै ३३ बलमा ६६ रन बनाए ।

रोहित पौडेलले ४१ रन बनाउँदा ओपनर आसिफ शेखले ३८ रन बनाएर आउट भएका थिए । अर्का ओपनर कुशल भुर्तेल २० बलमा १७ रन बनाए ।

आजको खेलमा पराजित भएसँगै पीएनजीको यो तेस्रो हार हो । यसअघि पीएनजीले नेपाल र मलेसियासँग एक–एक खेल गुमाएको थियो । यता, नेपाल लगातार आफ्नो तीन खेल्दै फाइनलमा पुगेको छ ।