काठमाडौँ । सुर्खेत वीरेन्द्रनगर नगरपालिकाका प्रमुख देवकुमार सुवेदीले पाँच वर्षमा आफूले पाएको पारिश्रमिकबाट अक्षय कोष स्थापना गरेका छन् । उनले पाँच वर्षे राज्यबाट प्राप्त पारिश्रमिक १३ लाख ५० हजार रुपैयाँ दिँदै रविजगत फाउण्डेसन स्थापना गरेका हुन् ।

गरिब तथा विपन्न महिला, बालबालिका र विद्यार्थीलाई सहयोग गर्ने उद्देश्यले फाउण्डेसन स्थापना गरिएको उनको भनाइ छ । गरिब, विपन्न, अपांगता भएकालगायतलाई सहयोग गर्ने उद्देश्यले रविजगत फाउण्डेसन स्थापना गरेको नगर प्रमुख सुवेदीले बताए ।

‘आदिवासी, जनजातिको भाषा, संस्कृति तथा अधिकारको संरक्षण गर्दै दलित, उत्पीडित, सीमान्तकृत वर्ग अपांगता भएका तथा अल्पसंख्याक समुदायका मानिसको हकहितका लागि फाउण्डेसनले काम गर्नेछ,’
उनले भने, ‘सडक, पुल, पाटीपौवालगायतका सामाजिक संरचना निर्माण तथा मर्मत संरक्षण, कृषि तथा पर्यावरणका साथै सामूहिक समुदायिक वन, कबुलियत वन जंगल संरक्षण, वृक्षारोपण, राष्ट्रिय तथा अन्तर्राष्ट्रिय कृषि उर्जा, जडिबुटी, सभा सम्मेलन तथा वातावरण संरक्षणमा विशेष भूमिका रहने छ ।’