सप्तरी । नेकपा एमालेका मधेस प्रदेश समिति सदस्य मोहमद इस्लाम मियाँ एमाले परित्याग गरी नेकपा माओवादी केन्द्रमा प्रवेश गरेका छन् ।

राजविराजमा शनिबार आयोजित कार्यक्रमका माओवादी केन्द्रका केन्द्रीय सदस्य तथा सप्तरी इञ्चार्ज अशोककुमार मण्डल, केन्द्रीय सदस्य असर्फी सदालगायतका नेताले उनलाई पार्टी प्रवेश गराएका थिए ।

मियाँ २०७४ सालको स्थानीय तह निर्वाचनमा बोदे बर्साइन नगरपालिकाको मेयरमा चुनाव लडेका थिए । २०७७ सालमा प्रतिनिधिसभा निर्वाचनमा क्षेत्र नम्बर ४ मा एमालेबाट उम्मेदवार बनेका थिए ।

आगामी ३० गते हुने स्थानीय तह निर्वाचनमा मियाँ पुनः मेयरमा उम्मेदवारी दिने तयारीमा छन् । पार्टी प्रवेश गरेसँगै माओवादी केन्द्रले मियाँलाई बोदे बर्साइन नगरको मेयरमा उम्मेदवार बनाउने तयारी भइरहेको छ ।

पार्टी प्रवेश कार्यक्रममा माओवादी केन्द्रका मधेस प्रदेश समिति सदस्यहरू महेशकुमार यादव, भागवत यादव, छेदी रजक विमल, जिल्ला समिति सदस्य दिलिपकुमार यादवलगायतको उपस्थिति थियो ।