काठमाडौँ । नेकपा एमालेका अध्यक्ष केपी शर्मा ओलीले काठमाडौँ महानगरको मेयरका उम्मेदवार केशव स्थापितको पक्षमा अभिव्यक्ति दिएका छन् ।

नेकपा एमालेबाट मेयरका उम्मेदवार बनेका स्थापितमाथि ‘मी टू’को आरोप उत्कर्षमा पुगेको अवस्थामा पार्टी अध्यक्ष ओलीले उनको पक्षमा अभिव्यक्ति दिएका हुन् । काठमाडौँमा आयोजित एक कार्यक्रममा बोल्दै उनले मी टू केही नभएको बताए ।

को हुन् केशव स्थापितसँग भनाभन गर्ने महिला ?

‘चुनावको बेलामा यस्ता आरोपहरू आउछन्, ‘मी टू’का कुरा आउँछ,’ अध्यक्ष ओलीले भने, ‘के हो मी टू भनेको ? हामीले काठमाडौँको मेयरमा केशव स्थापित जस्तो अनुभविलाई नेतृत्व दिन लागेका छौँ ।’

यस्तै, उनले मी टूको कुनै जवाफ नआउने भन्दै एमाले महिलाको अस्मिताको विषयमा गम्भिर हुने एक मात्र पार्टी भएको बताए ।

आजै मात्र नेसनल कलेजमा आयोजित एक कार्यक्रममा एक युवतीले ‘मी टू’को बारेमा प्रश्न गर्दा केशव स्थापितले अस्वभाविक उत्तर र शैली प्रस्तुत गरेका थिए ।