काठमाडौँ । होटल संघ पोखरा नेपालले हप्तामा दुई दिन बिदा दिने सरकारको निर्णयलाई स्वागत गरेको छ । संघका अध्यक्ष लक्ष्मण सुवेदीले एक विज्ञप्ति जारी गर्दै दुई दिन बिदा दिने व्यवस्थाले पर्यटन क्षेत्रमा सकारात्मक असर पर्ने उल्लेख बताए ।

लामो समयदेखि समस्या झेल्दै आएको पर्यटन क्षेत्रमा दुई दिने बिदाको व्यवस्थाले व्यवसायीमा केही राहत पुग्ने विश्वास लिइएको विज्ञप्तिमा उल्लेख छ । संघले दुई दिन बिदाको व्यवस्थालाई लामो समयदेखि माग गर्दै आएको अध्यक्ष सुवेदीले जानकारी दिए ।

कोरोनाका कारण सबैभन्दा बढी प्रभावित पर्यटन क्षेत्र नै हुन पुगेको र दुई दिने बिदाको व्यवस्थाले कोरोनाबाट थलिएको पर्यटन क्षेत्रलाई केही चलायमान बनाउन र आर्थिक गतिविधि बढाउन थप मद्दत पुग्ने विश्वास संघले लिएको विज्ञप्तिमा भनिएको छ ।