काठमाडौँ । रुस र युक्रेनका राष्ट्रपतिलाई जी २० शिखर सम्मेलनमा निम्तो गरिएको छ । इन्डोनेसियामा हुने तय भइसकेको सम्मेलनका लागि उनीहरूलाई इन्डोनेसियाका राष्ट्रपति जोको विडोडोले निमन्त्रणा गरेका हुन् ।

रुसका राष्ट्रपति भ्लादिमिर पुटिन र युक्रेनका राष्ट्रपति भोलोदिमिर जेलेन्स्कीलाई इन्डोनेसियाका राष्ट्रपति विडोडोले फोन गरेर निमन्त्रणा गरेको राष्ट्रपति कार्यालयले जनाएको छ ।

उनीहरूलाई यसअघि सम्मेलन आयोजक देशको रुपमा इन्डोनेसियाको तर्फबाट औपचारिक पत्र पठाइसकिएको कार्यालयद्वारा शुक्रबार जारी वक्तव्यमा लेखिएको छ । ‘मैले युक्रेनका राष्ट्रपति जेलेन्स्कीलाई सम्मेलनमा सहभागिताका लागि अनुरोध गरेको छु,’ राष्ट्रपति विडोडोले भने ।

उनले वार्ता र सम्झौतामार्फत रुससँगको युद्ध अन्त्य गर्न आग्रह गरेको समेत जानकारी दिए । फोन वार्ताका क्रममा रुसी राष्ट्रपति पुटिनले आफू सम्मेलनमा सहभागी हुने आश्वासन दिएको विडोडोले बताए ।

विश्वका प्रभावशाली विकसित देशहरूको समूहको रुपमा चिनिँदै आएको जी २० समूहको सदस्य रुस पनि हो । तर युक्रेन भने सदस्य छैन ।