काठमाडौँ । प्युठानको झिमरुक गाउँपालिकाको अध्यक्ष पदमा निर्वाचित पितबहादुर एमसीले कुनै सुविधा नलिने घोषणा गरेका छन् । नेकपा माओवादी केन्द्रबाट विजयी भएका एमसीले आज प्रमाण पत्र ग्रहण गर्दै कुनै सुविधा नलिने बताएका हुन् ।

‘मैले पाँच वर्षको अवधिभित्र यस गाउँपालिकाबाट जेजति सुविधा प्राप्त गर्ने छुट छ, वा संविधानले दिएको सुविधा छ, त्यो कुनै पनि सुविधा लिने छैन,’ उनले भने, ‘मैले प्राप्त गर्ने सुविधालाई कार्य नीति बनाएर कसरी अगाडि बढ्ने छु, मैले प्राप्त गर्ने सुविधा शिक्षा र तपाईंहरूलाई नै खर्च गर्न चाहन्छु ।

झिमरुकमा सत्ता गठबन्धन दलभित्र भागबण्डा नमिल्दा माओवादी र नेकपा एमालेले गठबन्धन गरी चुनावी मैदानमा गएको थियो । जसमा माओवादीका एमसी अध्यक्ष पदमा विजयी भएका थिए । यस्तै, उपाध्यक्षमा एमालेका उम्मेदवार विजयी भएका थिए ।

उनले झिमरुकमा सबै जनताले जितेको भन्दै आपसी सहमतिका आधारमा अघि बढ्दै काम गर्ने बताए ।