काठमाडौँ । गत वैशाख ३० गते सम्पन्न निर्वाचनको मत परिणाम करिब अन्तिम अवस्थामा पुगेको छ । यसपटकको निर्वाचनमा काठमाडौँ महानगरको मेयर पद नै स्वतन्त्र उम्मेदवार बालेन साह विजयी हुने निश्चित भएको छ ।

यस्तै, यसपटकको निर्वाचनमा तीन उपमहानगरमा समेत स्वतन्त्र उम्मेदवार विजयी भए । जसमा धनगढी, धरान र जनकपुरधाममा दलका उम्मेदवार पराजित गर्दै स्वतन्त्र उम्मेदवार विजयी भए ।

धनगढी र धरानका स्वतन्त्र उम्मेदवार विजयी भएसँगै पदभार ग्रहण गरी आफ्नो काममा लागेका छन् । तर, जनकपुरधाममा स्वतन्त्र उम्मेदवार बनेर मेयरमा विजयी भएका मनोजकुमार साह सुडी विवादमा तानिएका छन् ।

मेयरमा साह विजयी भएसँगै आज आयोजित सपथ ग्रहण समारोहमै विवाद उत्पन्न भएको हो । उनले सपथ ग्रहण कार्यक्रममा नेपाली कांग्रेसका नेता विमलेन्द्र निधिलाई प्रमुख अतिथि बनाएका थिए ।

आजै जनकपुरधाम पुगेका निधिलाई लिन साह विमानस्थल नै पुगेका थिए । यस क्रममा उनले आफू स्वतन्त्र उम्मेदवार नभई कांग्रेसकै उम्मेदवार भएकोसम्म भन्न भ्याए ।

संयुक्त रुपमा सपथ ग्रहण गर्न आयोजना गरेको कार्यक्रममा कांग्रेस नेता निधि प्रमुख अतिथिका रुपमा पुगेपछि निर्वाचिन नेकपा एमाले प्रतिनिधिहरूले बहिष्कार गरेका छन् । एमालेका निर्वाचिन प्रतिनिधिहरूले संयुक्त रुपमा विज्ञप्ति जारी गर्दै सपथ ग्रहण कार्यक्रम बहिष्कार गरेका हुन् ।

मेयरमा निर्वाचित साहले १३ हजार ४६५ मत ल्याएका थिए । उनले नेकपा एमालेका मेयर उम्मेदवार शिव शंकर साह पराजित गरेका हुन् । शिव शंकरले ९ हजार ५३२ मत पाए ।

यस्तै, कांग्रेससहितको सत्ता गठबन्धन दल जनता समाजवादी पार्टी लालकिशोर साहले ५ हजार १९४ मत पाए । उनी चौथो भएका छन् ।