काठमाडौँ । प्रमुख प्रतिपक्षी दल नेकपा एमालेले स्थानीय तह निर्वाचनमा जनमत तलमाथि नभएको तर सिट घटेको बताएको छ ।

आइतबार बसेको सचिवालय बैठकमा पत्रकारसँग कुरा गर्दै पार्टीका उपमहासचिव प्रदीप ज्ञवालीले मतमा एमाले ठूलो भएको भएको तर, नेतृत्वमा विगतभन्दा कमजोर नतिजा आएको बताए । त्यस विषयमा समीक्षा हुने उनको भनाइ थियो ।

पार्टीमा अन्तर्घात भएका विषयमा वडादेखि देशभर सम्बन्धित कमिटीमा समीक्षा हुने उनले बताए । उनले केही स्थानमा उम्मेदवारी चयनलगायत विषय मिलाउन नसक्दा समस्या देखिएको बताए ।

‘समयमै उम्मेदवार चयन गर्न नसक्दा, अकांक्षीको व्यवस्थापन गर्न नसक्दा, निर्वाचन परिचालनमा आवश्यक पर्ने कुशलता देखाउन नसक्दा केही ठाउँमा पराजय भएको छ,’ उनले भने, ‘प्रमाणित तथ्य र पार्टीलाई हराएको पुष्टि हुनेलाई सम्बन्धित कमिटीले कारबाही गर्ने छन्, तर पार्टीले कुन चाहिँ घात अन्तर्घात, कुन चाहिँ असमझदारी हो भनेर छुट्याउँछ र सही घारमा पार्टी पङ्क्तिलाई राख्न पहल हुने छ ।’

सरकारले नै निर्वाचनको स्वच्छतालाई दूषित बनाउने काम गरेको भन्दै एमालेले चिन्ता व्यक्त गरेको छ ।

०७४ सालको स्थानीय तहको निर्वाचनमा २९४ पालिकाको प्रमुख जितेको एमाले योपटक २०५ स्थानमा मात्रै जित हात पारेको थियो । यसका केही बाह्य र केही पार्टीभित्रकै कारण भएको एमाले सचिवालय बैठकले निष्कर्ष छ ।

पालिका प्रमुख र उपप्रमुखमा कम स्थानमा जित हात पारे पनि लोकप्रिय मत (पपुलर भोट)मा पहिलो भएको एमालेको निष्कर्ष निकालेको छ । पार्टी उपमहासचिव ज्ञवालीले प्रमुख, उपप्रमुख, वडाध्यक्ष र समग्र मत हेर्दा एमालेले ३४ प्रतिशत पपुलर भोट पाएको बताए ।

‘पपुलर भोटमा कांग्रेसभन्दा पहिलो शक्तिका रुपमा स्थापित हुँदै गरेको स्टेबल प्याटर्न हामीले देखेका छौँ, त्यसैले जनमत तलमाथि भएको छैन, परिणाम चाहिँ अपेक्षा अनुरुप आएको छैन,’ उनले भने ।

एमालेले आगामी मंसिरमा हुने प्रदेश र संघीय निर्वाचनको तयारीमा जुट्न सुरु गर्ने बताएको छ ।