काठमाडौँ । प्रधानमन्त्री शेरबहादुर देउवा अन्ततः सत्ता गठबन्धनमा रहेका दुई दल एकीकृत समाजवादी र जनता समाजवादीभित्रको चर्काे दवावका वीच मन्त्री हेरफेरको निर्णयमा पुगेका छन् । बजेट पारित भईसकेको र जसपाले विवाद टुग्गाएर सहमितमा मन्त्रीको नाम हेरफेरमा पठाए त्यही अनुसार मन्त्री हेरफेरमा प्रधानमन्त्री लचिलो बनेको बालुवाटार स्रोतले बताएको छ ।

तर उनले आफ्नो पार्टीकातर्फबाट सहभागी मन्त्री परिवर्तन गर्न चाहेका छैनन । माओवादी केन्द्रका अध्यक्ष प्रचण्डलाई पनि अहिले मन्त्री हेरफेर तिर नलाग्न सुझाई रहेका छन् । माओवादी अध्यक्ष प्रचण्ड पनि आफनो पार्टीका मन्त्री अहिले फेरेर चुनावको मुखमा ४ महिना नयाँ मन्त्री पठाउने सोचमा देखिन्नन् ।

तर माधव नेपालको पार्टी एकीकृत समाजवादीमा सवैलाई भाग पुरयाउने गरी आलोपालो मन्त्री बनाउने बचन अनुसार, मन्त्री फेर्ने पर्ने दवाव बढेपछि र उपेन्द्र यादवको पार्टी जनता समाजवादीमा यादव र संघीय परिषद् अध्यक्ष डा बाबुराम भटटराईको आ आफनै रोजाईको मन्त्रीको सूची तयार भएपछि प्रधानमन्त्री गठबन्धनमा सहभागी दुई दलका मन्त्री हेरफेर गर्ने सोचमा पुगेका हुन् ।

यधपी, उनले जसपाभित्रको हेरफेरले पार्टीमा विग्रह ल्याउन सक्नेमा सचेत देखिएका छन् । जसपाको आन्तरिक विवादमा आफु नपर्ने गरी उनले कसरी हेरफेर गर्ने भन्नेमा अर्काे गठबन्धन दल माओवादी केन्द्रका अध्यक्ष प्रचण्डसँग सम्वाद गरिरहेका छन् ।

एकीकृत समाजवादीले सचिवालय बैठकबाटै आफ्ना मन्त्री फिर्ता बोलाएर नयाँ पठाउने निर्णय गरिसकेको छ । त्यसलाई स्थायी समिति बैठकबाट पनि अनुमोदन गराईसकेको छ । एकीकृत समाजवादीले मन्त्रीहरू प्रेमबहादुर आले, कृष्णकुमार श्रेष्ठ, विरोध खतिवडा र रामकुमारी झाँक्रीलाई फिर्ता बोलाएर जीवनराम श्रेष्ठलाई संस्कृति, पर्यटन तथा नागरिक उड्डयन, मेटमणि चौधरीलाई सहरी विकास, शेरबहादुर कुँवरलाई श्रम तथा रोजगार र भवानी खापुङलाई स्वास्थ्यमन्त्री तथा हीरा केसीलाई स्वास्थ्य राज्यमन्त्री बनाउने निर्णय गरेको थियो ।

जसपामा भने उपेन्द्र यादव अहिलेका उधोगमन्त्री महेन्द्र राय यादवलाई फिर्ता बोलाएर उनको ठाँउमा नयाँ पठाउने र अरुलाई निरन्तरता दिन चाहिरहेका छन् । तर डा भटटराई पूरै सेट फेर्न खोजिरहेका छन् । महेन्द्रराय यादव डा भटटराई पक्षमा रहेका कारण यादव उनलाई मात्रै फेर्न चाहिरहेका छन् ।

तर जसपामा यादव र भटटराईको विवादका कारण के गर्ने भन्ने अन्यौल कायमै छ । डा बाबुरामले यादवले मात्र पठाएको सूचीका आधारमा निर्णय नगर्न र पार्टीमा यादव, आफु र अशोक राईको हस्ताक्षरलाई मात्र कार्यान्वयन गर्न प्रधानमन्त्रीमाथी दवाव बढिसकेको छ । दुवै पक्ष पार्टी विभाजन हुन सक्ने भन्दै बहुमत आफ्नोतर्फ पार्न सांसद तानातानमा छन् ।

स्रोतका अनुसार मन्त्री बदलेर भए पनि यादव पार्टीमा बहुमत बचाइराख्ने दाउमा छन् भने भट्टराई मन्त्रीको अफरसहित धेरै सांसदलाई आफ्नो पक्षमा पार्ने योजनामा छन् । यादव र भट्टराई दुवैले प्रधानमन्त्रीलाई भेटेर आफूले सिफारिस गरेअनुसार मन्त्रिपरिषद् हेरफेर गर्न आग्रह गरेको बालुवाटार स्रोत बताउँछ ।

माओवादीमा केही नेताहरुले अर्थमन्त्री विवादमा रहेको भन्दै उनलाई फिर्ता बोलाउनु पर्ने बताउन थालेका छन् । तर प्रचण्ड अर्थमन्त्री झिक्ने पक्षमा छैनन । प्रचण्ड अहिले चुनावको बेला मन्त्री हेरफेरको किचलोमा नपर्ने तयारी माओवादी अध्यक्ष प्रचण्डको छ । फेर्ने पर्ने भए पार्टीको असार १५ बाट बोलाएको केन्द्रीय समिति बैठक अगाडी कुनै निर्णयमा पुग्ने सोचमा प्रचण्ड छैनन ।

प्रधानमन्त्री देउवा जसपा र एकीकृत समाजवादीको किचलो र दवावका कारण अव एकाध दिनमै मन्त्री हेरफेरको निश्कर्षमा पुगेका छन् । उनले सुदूरपश्चिम प्रदेशका कार्यक्रम सकाएर फर्किएपछि मन्त्रिपरिषद् हेरफेर को तयारी गरेका छन् ।